ТҮРКІСТАН: ШАРДАРАЛЫҚ КӘСІПКЕР 20 МЕКТЕПТІҢ АСХАНАСЫНА ҚАЖЕТТІ ЖАБДЫҚТАРДЫ ТАРТУ ЕТТІ

Түркістан облысында жүрегі жомарт азаматтар тарапынан жергілікті тұрғындарға әрқашан қолдау көрсетіліп тұрады. Солардың бірі – шардаралық кәсіпкер Данияр Омаров. Ол отбасы атынан аудандағы 20 мектептің асханасына қажетті жабдықтарды тарту етті.
Атап айтқанда, кәсіпкер ауыл мектептерінің сұранысына қарай, тоңазтқыш, су жылытқыш, желдеткіш, қол жууға арналған қазандықтар және басқа бірқатар мектеп асханасына қажетті жабдықтарды үлестірілді. Бұдан бөлек, кәсіпкер «Мектепке жол» акциясы аясында әлеуметтік аз қамтылған 1500 балаға мектепке қажетті заттарды алып берген.
Бүгін білім ұяларына заттарды тапсыру үшін жиналған басқосуда Шардара аудандық білім бөлімі басшысының міндетін атқарушы Д.Нұсқабаева бүкіл мектеп ұжымының атынан демеушіге алғыс білдіріп, жұмысына табыс тіледі. Данияр Омаров алдағы уақытта да мүмкіндігінше көмек көрсетіп отыратынын жеткізді.
– Мен бұл жасаған қайырымдылық ісімді мақтану үшін емес, үлгі ретінде көрсеткім келді. Мектептерде ыстық тамақпен қамтылып отырған біздің жас бүлдіршіндерімізге қолайлы жағдай жасап, олдардың алаңсыз білім алуына жағдай жасау әрқайсысымыздың міндетіміз деп білемін. Маған бүлдіршіндердің шынайы күлкісі мен елдің ыстық ықыласы маңызды. Алдағы уақытта да қолымыздан келгенше көмектесіп отыруға дайынбыз, – деді кәсіпкер.
Айта кетейік, қазіргі уақытта Шардара ауданы бойынша бастауыш сыныпта оқитын 8181 оқушы ыстық тамақпен қамтылып отыр.
Айта кетсек, Түркістан облысында «Жайлы мектеп» Ұлттық пилоттық жобасын іске асыру шеңберінде 2023-2025 жылдары 63 мектептің құрылысын салу жоспарланған.
Аталған 63 мектептің ішінде 300 орындық — 11 мектеп, 600 орындық — 25 мектеп, 900 орындық- 15 мектеп, 1200 орындық — 6 мектеп, 1500 орындық – 4 мектеп, 2000 орындық — 2 мектеп бар. Нәтижесінде 49 мың оқушыға мектептен орын дайындалады.
Биыл 29 мектептің құрылыс-монтаждау жұмыстарын жүргізетін мердігер мен жобалаушы мекемелер анықталды. Олар 2024 жылы пайдалануға берілетін болады. Қалған 34 мектептің құрылыс жұмыстары 2024 жылы басталып, 2025 жылы аяқталады. «Ұлттық жоба» аясында облыстағы апатты 8 мектептің үшеуінің, үш ауысымға өту қаупі бар 21 мектептің 14-нің мәселесі шешілетін болады.