Түркістан облысында тұрғын үй құрылысы жаласуда. Облыс әкімі Дархан Сатыбалды бүгін Кентау қаласында салынып жатқан үйлерді аралап көрді. Уәлиханов көшесінде орналасқан №150 көпқабатты тұрғын үйдің құрылысымен танысып, мердігермен кездесті. Құрылыстың сапасына басты назар аударуды ескертті.
Қазіргі уақытта үйлердің кірпіші қаланып, инфрақұрылымы жүргізіліп жатыр. Құрылыс жұмыстарын «Іргетас-Құрылыс ІІ» ЖШС жүргізуде. 5 қабатты тұрғын үйдің құрылысы қыркүйек айында аяқталады деп жоспарланған. Пәтерлердің жалпы ауданы 3 мың шаршы метрден асады. 60 пәтерлі тұрғын үй баспана кезегінде тұрған отбасыларға беріледі.
Айта кетейік, бұл тұрғын үйлердің құрылысына 2020 жылы жергілікті бюджет есебінен 1000,0 мың теңге қаралып, түзілген келісім шарт негізінде құрылыс жұмыстары басталған болатын. Алайда, 2021-2022 жылдарға тұрғын үй құрылысына қаржы қаралмауына байланысты, құрылыс жұмыстарын уақытша тоқтатылған. 2023 жылға 1 көпқабатты әлеуметтік кредиттік тұрғын үй құрылысына облыстық бюджеттен 300,0 млн теңге қаржы қаралып, 2024 жылдың соңына дейін құрылыс жұмыстарын аяқтау жоспарланған. Қалған 4 көпқабатты тұрғын үй бойынша республикалық және облыстық бюджеттен қаржы сұратылған.
Кентауда өндіріс орындарын ашып, инвестициялық әлеуетін көтеру керек. Сонымен бірге жерге қатысты заңсыздықтарды жойып, жүйелі тірлік атқару қажет. Түркістан облысының әкімі Дархан Сатыбалды Кентау тұрғындарымен кездесуде осы және өзге де мәселелерге тоқталды. Атқарылған жұмыстарды баяндап, кемшіліктерді де айтты.
– «Ауыл – Ел бесігі» жобасы аясында Кентау қаласында 2023 жылы 2 елді мекенде 7 жобаны іске асыруға облыстық бюджет есебінен 242 млн. теңге бөлінді. Атап айтқанда, Хантағы және Ащысай елді мекендеріндегі 18 көшеге 242 млн. теңгеге қаралып, орташа жөндеу жұмыстары жүргізілді. 2024 жылы 3 елді мекенде 6 жобаны іске асыру үшін 477 млн. теңге қаралды «Ауыл аманаты» бағдарламасы бойынша 492 млн. теңгеге 92 жоба қаржыландырылды. АҚШ-тың белгілі инженері Илон Масктің «Starlink» спутниктік интернет құрылғысы Кентау қаласында 2 мектепте іске қосылды. Кентаудың жалпы өңірлік өнім көлемі 2021 жылдан бері 26 пайызға өсіп, 2023 жылы 76 млрд. теңгеге жетті. Биыл 4 айда бұл көрсеткіш 23 млрд. теңгені құрап, өткен жылдың тиісті кезеңімен салыстырғанда 16 пайызға өскен. Негізгі капиталға тартылған инвестиция көлемі 46,7 млрд. теңгені құрап, жоспар 784 млн. теңгеге артығымен орындалды. Дегенмен, Кентаудың әлеуеті бұдан да жоғары. Біз елдің табысын көтеру үшін жұмыс орындарын ашу, инвестиция тарту мәселесін күн тәртібінен түсірмейміз. Басым бағытымыз – зауыттар мен кәсіпорындар ашу. Инвестор тарту, жобаларды жүзеге асыру өте қиын. Бірақ жұмыс жүріп жатыр. Кәсіпкерлерге қолдау көрсетуге дайынбыз, – деді Дархан Сатыбалды.
Кездесуде Кентау қаласының әкімі Жандос Тасовтың есебі тыңдалды. Сұрақ-жауап кезеңінде тұрғындар облыс әкіміне жер дауы, баспанамен қамту, мәдениет үйін салу, жұмыссыздық мәселесі және өзге де түйткілдер тарқатылды. Кентаудағы жылу орталығын жөндеу барысы да айтылды.
Одан кейін облыс әкімі Дархан Сатыбалды тұрғындарды жеке қабылдады. Түрлі өтініштер мен ұсыныстар айтылып, мәселелер бақылауға алынды.
