Арыс қаласында «Таза Қазақстан» экоакциясы жалғасуда. Акция аясында қала көшелерінің бойында орналасқан светодиодты түнгі жарықшамдарға жаппай зерделеу жұмыстары жүргізіліп, істен шыққан лампалар жаңасына ауыстырылып жатыр. Негізгі орталық көшелерде тиісті жұмыстар жүргізіліп біткен соң, ішкі көшелердің бәрінде істен шыққан түнгі жарықшам бағаналары қалпына келтірілетін болады.
Бүгін Арбат демалыс аумағында орындықтарды сырлау, бұзылғандарын ретке келтіру, ағаштарды суарып, арамшөптерін шабу жұмыстары да қарқынды жүргізілуде. Сонымен қатар брусчаткалар ретке келтіріліп, ойын балалары үшін барынша жағдайлар жасалынуда.
Ал «Теміржолшылар» саябағында маусым айында түнгі жарықшамдар іске қосылып, балалар үшін таптырмас ойын сауық орталығына айналды. Бұдан бөлек, саябақ аумағынан қоқыстар жиналып, полигонға шығарылуда.
Абаттандыру, тазалау шаралары Дендросаябақ, С.Адабеков саябақтарында да жалғасуда. Аталған жұмыстарды «Qazaq Real Stroy» ЖШС атқаруда.
Ал И.Ақымбеков көшесі бойындағы аллеяда автоматты суару жүйелері іске қосылып, газондарды суару жұмыстары. сонымен қатар тазалық жұмыстары тұрақты жүргізіліп жатыр. Сәуір айынан бастап республика бойынша «Таза Қазақстан» тазалық науқаны басталған болатын. Акция аясындағы іс-шаралар Сайрам ауданында бүгінде өз жалғасын тауып жатыр. Осы орайда, аудан аумағын көркейту бағытында аудан әкімі Арман Сәбитовтің бастамасымен аудан, ауылдық округ аумағындағы тұрғын үйлердің аулалары мен көшелері тазаланып, көріктендіру, абаттандыру шаралары қарқынды қолға алынуда. Атап айтқанда, шөп ору, ағаш түптерін әктеу, темір қоршаулар мен орындықтарды сырлау, қураған ағаш бұталарын қырқу, жол жиектері мен арық-атыздарды қоқыс қалдықтарынан арылту жұмыстары апта сайын қызу жүріп жатыр.
Қоршаған ортаның тазалығына бейжай қарамайтын аудан әкімі әр ауылдық округтерді арнайы аралап, тазалық жұмыстарының атқарылу барысын бақылады. Аралау барысында тиісті сала басшылары мен орынбасарларына, сондай-ақ, ауылдық округ әкімдеріне алдағы уақытта тазалық жұмыстарын бұдан да қарқынды жүргізуді тапсырды.
Айта кетейік, аудан аумағында жыл басынан бері бүгінгі күнге дейін жалпы 72 сенбілік өткізілді. Сенбіліктерге жалпы 135000 адам және 267 техника жұмылдырылды. Нәтижесінде 5012 тонна күл-қоқыс қатты тұрмыстық қалдықтар тастайтын полигон аумақтарына шығарылды. Сенбілік барысында 753 шақырым облыстық, аудандық маңызы бар жолдар мен ішкі көшелер, 52 шақырым аяқжол, 98 шақырым ирригациялық жүйелері мен арық-атыздар күл-қоқыстардан тазаланды. Бұдан бөлек, 16 саябақ пен сквер, 33 аялдама, 42 спорт және балалар алаңшалары мен 12 стрит-воркауттар сырланып, қалпына келтірілді.
