Күннің суығы мен ызғары сүйектен өтсе де біз тұрып жатқан өңірдің тазалығы үшін, қозғалыстың еркін болуы мен жолдардың ашық болуы үшін қоғам игілігіне жұмыс жасап жүрген жандарға жылу сыйлау мақсатында рухтастар “Кел, шай ішейік!” акциясын өткізді. Тәттілер мен ыстық шай ұсынып көңілге демеу болар жылы лебіздерімен, көпшіліктің алғысын жеткізді. Түркістанда өңір жастары еңбек адамдарына жылулық сыйлады. Олар киелі шаһардың тазалығына үлес қосып жүрген 100-ге жуық адамға тегін шай мен ыстық нан таратты. Аталған іс-шараны облыстық жастар ресурстық орталығы ұйымдастырды.
Орталық мамандары мен еріктілер қала көшелерінде, аялдамаларда және саябақтарда өткен шараға белсене қатысты. Осылайша тұрғындардың ақ батасын алып қайтты. «Волонтерлер үнемі келіп, көмектесіп тұрады. Қыз-жігіттерге алғысымызды білдіреміз. Мұндай аязды күндері бір шыны-аяқ шайдың өзі денеге де, жүрекке де жылу сыйлайды» деп қала тұрғыны өз тілегін жеткізді.
Айта кетейік, іс-шараның негізгі мақсаты – қоғамда, өскелең ұрпақ арасында мейірімділік, қамқорлық сезімін қалыптастыру, қайырымдылықты насихаттау, жастарды үлкенге құрмет көрсетуге тәрбиелеу. Аяз уақытында қала тұрғындарына және қаланың көркеюіне өз үлестерін қосып, көше тазалығымен айналысып жүрген азаматтарға ыстық шай ұсынуы адамдардың жандарына жылу сыйлап, көңілдерін жібітті.
Ал «AMANAT» партиясы Бәйдібек аудандық филиалы «Жастар рухы» жастар қанатының белсенді жастары «AMANAT» партиясы Бәйдібек аудандық филиалының қызметкерлері партияның “Ардагерлерді ардақтайық” жобасы және “Таза Бейсенбі” экологиялық акциясы аясында ардагерлердің ауласын қардан тазалау жұмыстарын атқарды.
Партияластар, белсенді жастар Бәйдібек ауданы Алмалы ауылының тұрғыны, жалғызбасты Қарлығаш Байтемірова әжейдің қар басып қалған ауласын тазартып, отынын бұтап, үйін ретке келтіріп берді. Қарт әжей қолғабыс жасаған ерікті жастарға және филиал қызметкерлеріне алғысын білдіріп, ризашылығын жеткізді.
