«AMANAT» партиясы Шымкент қалалық филиалы жанындағы «Жастар рухы» жастар қанатының белсенділері қайырымдылық шарасын ұйымдастырды. «Ардагерді ардақтайық» партиялық жобасы аясында олар 77 жастағы қала тұрғыны Айтбай Дүйсебаев Әжібекұлының үйіне барып, көмек қолын созды.
Жастар қарияның ауласын жиналып қалған қоқыстан тазартып, жүріп-тұруына қолайлы жағдай жасады. Бұл игі іс ардагердің тұрмысын жеңілдетуге бағытталды. Өз кезегінде Айтбай Әжібекұлы көмек көрсеткен жастарға ризашылығын білдіріп, алғысын айтты.
Шараға жетекшілік еткен «Жастар рухы» жастар қанатының жетекшісі Бекзат Төлебай бұл бастаманың әлеуметтік желідегі ақпарат арқылы қолға алынғанын атап өтті. Ол сондай-ақ, жастардың қайырымдылық бағытындағы жұмыстары мұнымен шектелмейтінін, алдағы уақытта да мұқтаж жандарға көмек көрсетуді жалғастыратынын айтты.
Осындай игі істер қоғамдағы үлкендерге деген құрметтің көрінісі ғана емес, сонымен қатар жастардың жауапкершілік пен жанашырлық қасиеттерін нығайтуға ықпал етеді. «Жастар рухының» белсенділері алдағы уақытта да қайырымдылық шараларын ұйымдастыруды жалғастырмақ.
