(Шымкент қ. спорт басқармасы)
Қытайдың Шаогуань қаласында өткен жастар және жасөспірімдер арасындағы каратэден Азия чемпионатында шымкенттік спортшылар ел намысын абыроймен қорғап, жоғары нәтижелерге қол жеткізді. Бұл жеңістер – спортшыларымыздың қажырлы еңбегінің, кәсіби жаттықтырушылардың жанкешті дайындығының және мемлекет тарапынан спорт саласына көрсетіліп отырған жүйелі қолдаудың айқын дәлелі.
Жарыс нәтижелері төмендегідей:
І орын: Балнұр Құрбанәлі (61 кг, жасөспірімдер);
ІІІ орын: Айша Ұнталап (54 кг, жасөспірімдер);
ІІ орын: Айжан Бәкірова (61 кг, жастар);
ІІІ орын: Лаура Сағынбек (68 кг, жастар).
Айта кетсек, Шымкенттегі спорт мектептерінде каратэ бағыты бойынша жүйелі дайындық пен кәсіби жаттықтыру жұмыстары жолға қойылған. Соның нәтижесінде жасөспірімдер мен жастар арасында сенімді әрі мықты спорттық резерв қалыптасып келеді. Бүгінгі жеңімпаздар – ертеңгі чемпиондар.
Дархан Асаділов пен Софья Берульцева сынды әлемдік деңгейде танылған жұлдыздардың ізін жалғастырып келе жатқан жаңа толқын өсіп келеді. Бұл – шымкенттік спорт мектебінің тұрақты дамуы мен жеңімпаздық рухының айғағы.
Айта кетерлігі, мұндай табыстар тек спортшының жеке талантына ғана емес, сонымен бірге жаттықтырушылардың еңбегі мен спорт инфрақұрылымының даму деңгейіне тікелей байланысты. Жүйелі қолдау, тәртіп пен еңбек – үлкен жетістіктің кепілі екені тағы бір мәрте дәлелденді.
