(Фото: Шымкент қ. денсаулық сақтау басқармасы)
Ақтау қаласында үш күн бойы өткен халықаралық жедел медициналық жәрдем бригадаларының республикалық чемпионатына еліміздің 20 өңірінен, сондай-ақ Ресей, Беларусь және Әзербайжаннан командалар қатысты.
Бұл додада Шымкент қалалық жедел медициналық жәрдем станциясының фельдшерлік бригадасы балаларға реанимация жасау кезеңінде үздік шығып, бірінші орынды иеленді. Ерекшелігі – топ құрамында дәрігер болмағанына қарамастан, кәсіби біліктілігі арқасында жеңімпаз атанды. Ал жалпыкомандалық есепте шымкенттіктер 5-орынға тұрақтады.
Чемпионаттың басты мақсаты – жедел жәрдем қызметкерлерінің кәсіби шеберлігін арттырып, тәжірибесін шыңдау және медициналық көмектің сапасын көтеру. Мұндай байқаулар мамандарға тәжірибе алмасуға, жаңа әдіс-тәсілдерді үйренуге мүмкіндік береді.
Айта кетейік, шымкенттік ақ халаттылар жыл сайын республикалық чемпионаттарға қатысып, тұрақты түрде жақсы нәтижелер көрсетіп жүр.
