(Фото: Шымкент қ. әкімдігі)
Биыл Қазақстанның Егемендігі туралы декларацияның қабылданғанына 35 жыл толып отыр. 1990 жылы 25 қазанда еліміздің тарихында ерекше орын алған, халқымыздың дербес, тәуелсіз мемлекет болуына жол ашқан маңызды құжат – Егемендік декларациясы қабылданған болатын. Сол себепті бұл күнді халқымыз үшін қастерлі, тарихи маңызы зор мереке деп бағалауға болады. Осы ретте Шымкент қаласында Республика күніне арналған «Қыран елім – Қазақстаным» атты салтанатты мерекелік іс-шара ұйымдастырылды.
Шараға қала әкімі Ғабит Сыздықбеков, мемлекеттік органдар мен қоғамдық ұйымдардың, түрлі еңбек ұжымдарының өкілдері, сондай-ақ жастар қатысты. Қала басшысы барша қатысушыларды еліміздің тарихында маңызды орын алған мерекемен шын жүректен құттықтап, халқымыздың бірлігін, еліміздің тұрақтылығы мен дамуын атап өтті.
Салтанатты шара барысында бірқатар азаматқа Президент атынан мемлекеттік марапаттар табыс етіліп, белгілі азаматтарға қала әкімінің алғыс хаттары берілді. Бұл – елдің дамуына сүбелі үлес қосып жүрген азаматтарды қолдаудың, олардың еңбегін бағалаудың нақты көрінісі болды.
Қала әкімі Ғабит Сыздықбеков өз сөзінде бүгінгі таңда Президент Қасым-Жомарт Кемелұлының бастамасымен елімізде саяси-экономикалық жаңару кезеңі қарқынды жүріп жатқанын атап өтті.
Бүгінде Президентіміз Қасым-Жомарт Кемелұлының бастамасымен елімізде саяси — экономикалық жаңару кезеңі жүруде. 2025 жыл «Еңбек адамы мен жұмысшы мамандықтар жылы» деп жарияланып, қарапайым еңбеккерлер мен жұмысшылардың мәртебесін арттыруға күш салынуда. Себебі, еңбек адамы – ел дамуының тірегі, — деді қала әкімі.
Сонымен қатар, Ғ.Әбдімәжитұлы Шымкенттің бүгінгі таңда білім, инновация және заманауи инфрақұрылым орталығы ретінде қарқынды дамып келе жатқанын ерекше атап өтті. Соңғы үш жыл ішінде қалаға 2 триллион теңгеден астам инвестиция тартылып, бұл қаржы өндіріс пен құрылыс салаларының дамуына айтарлықтай серпін берді. Өнеркәсіп саласында 2023 жылдан бері 3,4 триллион теңгеге өнім өндіріліп, қаланың экономикалық әлеуеті айтарлықтай артты.
Халықты баспанамен қамтамасыз ету мақсатында қалада 3 миллион шаршы метрден астам тұрғын үй пайдалануға берілді. Сонымен қатар, қаланың бюджеттік мүмкіндіктері алғаш рет 895 миллиард теңгеге жетіп, оның 50 пайызы әлеуметтік саланы қолдауға бағытталды. Мұның барлығы – жұмысшылардың, мұғалімдердің, дәрігерлердің, инженерлердің, кәсіпкерлердің қажырлы еңбегі нәтижесінде жүзеге асырылып отыр. Қала әкімі атап өткендей, біздің ортақ міндетіміз – Отанымыз, тәуелсіз Қазақстанымыздың гүлденуі үшін аянбай еңбек ету. Басты мақсатымыз – әрбір қазақстандықтың өмір сапасын арттыру және қаламыздың дамуына өз үлесімізді қосу.
Мерекелік іс-шараның соңы көрермендерді қуанышқа бөлеген, мерекелік көңіл-күй сыйлаған танымал өнерпаздардың концертімен жалғасты. Концерт барысында қатысушылар ән мен би, рухты шығармалар арқылы мерекенің атмосферасына бөленіп, елдің бірлігін, татулығын және Қазақстанның гүлденуіне деген сенімін атап өтті.
