(Фото: gov.kz)
2025 жылдың 31 қазанында Шымкент қаласында тұрғындардың құқықтық сауаттылығын арттыруға және қоғамда заң үстемдігін нығайтуға бағытталған дәстүрлі «Халық заңгері» республикалық әлеуметтік акциясы өтеді. Бұл игі бастама Қазақстан Республикасы бойынша кең көлемде жүзеге асырылып келе жатқан әлеуметтік жоба болып табылады. Оның басты мақсаты – «Заң мен тәртіп» қағидаты аясында тұрғындарға тегін заң көмегін көрсету, азаматтардың құқықтары мен заңды мүдделерін қорғауға ықпал ету және халық пен мемлекеттік органдар арасындағы өзара сенімді нығайту.
Іс-шара Шымкент қаласындағы «Көрме» орталығында өткізіледі. Акцияның ресми ашылуы сағат 17:00-де басталады. Ұйымдастырушылардың айтуынша, акцияға қатысушылар заң саласының үздік өкілдерінен кәсіби кеңес алу мүмкіндігіне ие болады.
Акцияның ерекшелігі – оның ауқымының кеңеюі және қатысушы мамандардың құрамы. Азаматтарға кеңес беру үшін жергілікті атқарушы органдардың басшылары, аумақтық және құқық қорғау органдарының жетекшілері, прокурорлар, сондай-ақ тергеушілер, сот орындаушылары, адвокаттар, нотариустар қатысады.
Акция барысында азаматтар түрлі бағыттар бойынша – азаматтық, қылмыстық, әкімшілік, еңбек, тұрғын үй, жер, отбасылық және әлеуметтік заңнамалар аясында өз сұрақтарына нақты әрі түсінікті жауап ала алады. Мысалы, тұрғын үй даулары, несиелік міндеттемелер, еңбек қатынастары, алимент өндіру немесе жер теліміне қатысты құқықтық мәселелер бойынша жеке консультациялар беріледі.
Іс-шараның ұйымдастырушылары атап өткендей, «Халық заңгері» акциясы тек заң көмегін көрсетіп қана қоймай, сонымен бірге азаматтардың құқықтық мәдениетін көтеруге бағытталған. Мұндай кездесулер тұрғындардың мемлекеттік органдарға деген сенімін арттырып, қоғамда ашықтық пен әділдік қағидаттарын нығайтады.
Бүгінде құқықтық сауаттылық – әр азаматтың өмірінде маңызды рөл атқаратын фактор. Өйткені заңды білу және оны дұрыс қолдану – жеке құқықтарды қорғаудың, қоғамдағы әділдік пен тәртіптің кепілі. Осы тұрғыдан алғанда, «Халық заңгері» акциясы ел көлемінде азаматтар арасында құқықтық мәдениетті дамытуға серпін беріп келеді.
Акцияға қатысу барлық азаматтар үшін тегін. Келушілер өз сұрақтарын тікелей сала мамандарына қойып, нақты тәжірибелік кеңес алу мүмкіндігіне ие болады. Сондай-ақ іс-шара кезінде тұрғындарға құқықтық тақырыптағы ақпараттық жадынамалар мен әдістемелік материалдар таратылады.
Шымкент қаласы әкімдігі мен прокуратурасы қала тұрғындарын белсенді қатысуға шақыра отырып, бұл акцияның қоғам мен билік арасындағы ашық әрі сындарлы байланыстың айқын көрінісі екенін атап өтеді.
