Шымкент қаласының спортшылары халықаралық жарыстарда табысты өнер көрсетіп, ел қоржынына бірқатар жүлде салды. Грек-рим күресі мен бокс бойынша өткен беделді турнирлерде шымкенттік спортшылар жоғары нәтижеге қол жеткізіп, Қазақстанның спорттағы беделін арттыра түсті.
Албанияның Тирана қаласында күрес түрлерінен өткен Muhamet Malo рейтингтік турнирінің екінші жарыс күнінде Қазақстан құрамасы грек-рим күресінен екі жүлдеге ие болды. 67 келі салмақ дәрежесінде сынға түскен Мейіржан Шермағанбет финалдық белдесуде грузиялық Диего Чхиквадзені жеңіп, алтын медальді жеңіп алды. Осылайша ол Қазақстан құрамасының қоржынына грек-рим күресінен алғашқы алтын жүлдені салды. Ал 63 келі салмақта белдескен Ернұр Фидахметов турнир қорытындысы бойынша қола медаль иеленді. Айта кетейік, аталған додаға әлемнің 29 елінен 177 спортшы қатысып, жоғары деңгейде өтті. Сонымен қатар, Болгария Республикасының астанасы София қаласында 2025 жылғы 23 ақпан мен 2 наурыз аралығында өткен дәстүрлі «Странджа» халықаралық бокс турнирінде де шымкенттік спортшылар табысты өнер көрсетті. Беделді жарыста қала спортшылары 1 алтын және 1 күміс медаль жеңіп алды.
Әйелдер арасында 54 келі салмақ дәрежесінде өнер көрсеткен жастар арасындағы әлем чемпионы Элина Базарова финалда Ұлыбритания өкілі Лорен Маккиді 5:0 есебімен айқын басымдықпен жеңіп, турнир чемпионы атанды. Элина жарыс барысында Аустралия, Түркия және Қазақстан спортшыларын жеңіп, жоғары дайындық деңгейін көрсетті. Сондай-ақ 65 келі салмақ дәрежесінде 2025 жылғы Қазақстан чемпионы Лаура Есенкелді финалда Өзбекстан өкілі, әлем чемпионатының бірнеше дүркін жүлдегері Навбахор Хамидовамен кездесіп, күміс медаль иеленді. Айта кету керек, Лаура жартылай финалда Ирландия спортшысын 4:1 есебімен жеңіп, финалға жолдама алған болатын.
Жалпы биылғы «Странджа» турниріне 31 елден 338 боксшы (209 ер, 129 әйел) қатысып, жоғары бәсекелестік жағдайында өтті. Шымкент қаласының спортшылары көрсеткен нәтижелер олардың кәсіби шеберлігі мен тыңғылықты дайындығын айқындап, қазақстандық спорттың халықаралық аренадағы беделінің артып келе жатқанын дәлелдейді.
