Бүгінде Шымкент қаласының аумағында 36 көпір бар. Оның 6-ы апатты жағдайда екені анықталған. Сондықтан 5 көпірді жөндеу жұмыстарына қазынадан 926,8 млн қаржы қаралды. Бұл туралы Шымкент қаласы әкімінің баспасөз қызметі хабарлады.
Нақтырақ айтсақ, ет комбинаты маңындағы, Леңгер тас жолындағы, Маятас, Тоғыс, Елтай тұрғын алаптарындағы көпірлерді қайта қалпына келтіру жұмыстары жүргізіліп жатыр. Жөндеу жұмыстары жыл соңына дейін бітуі тиіс.Шымкент қаласының әкімі Мұрат Әйтенов қалаға қосылған тұрғын алабтарды аралап, халықпен кездесуінде айтылған мәселелер оң шешімін табуда. Атап айтсақ, Маятас, Тоғыс тұрғын алабтарындағы Бадам өзенінің үстінен өтетін 2 көпірдің құрылысына жергілікті бюджеттен 310 млн. теңге бөлініп, құрылыс жұмыстар жүргізілуде.
Ал Базарқақпа елдімекені маңындағы бір көпір үшінші мегаполис аумағында орналасқанымен , облыстық жол бойында тұр. Сондықтан оған Түркістан облысы әкімдігі тарапынан жөндеу жұмыстары жүргізілуде.
