Шымкентте жыл басынан бері ұзындығы 203 шақырым болатын 160 көшеде жол жөндеу жұмысы аяқталды. Енді жоспарланған жұмыстан ұзындығы 213 шақырымды құрайтын 99 көше қалды. Қыркүйек және қазан айларында жұмыстың 80 пайызы аяқталады деп күтілуде. Бұл туралы Шымкент қаласы әкімінің баспасөз қызметі мәлімдеді.
Осы бағытта атқарылып жатқан жұмыстармен Шымкент қаласы әкімінің орынбасары Мақсұт Исахов танысып шықты. Ол қалада жол құрылысынан бөлек өткелдерді ретке келтіру, бағдаршам орнату, көшелерді таңбалау жұмыстары да жүргізіліп жатқанын айтты.
Сонымен қатар, Қаратау ауданына қарасты “Тұран” шағынауданында орналасқан көпқабатты тұрғын үйлерге баратын №1, №2 және №7 көшелері күрделі жөндеуден өтіп жатыр. “Сайрам” тұрғын алабындағы облыстық маңызы бар 4 көшеде 2018 жылы басталған күрделі жөндеу жұмыстары 2020 жылдың соңында пайдалануға берілетін болады. Қазіргі уақытта аудандағы жалпы ұзындығы 39 шақырымды құрайтын 108 топырақ көшеге шағал тас төсеу жұмыстары жүргізілуде.
Шымкентте аялдамалар да жаңартылып жатыр. Бүгінде негізгі жолдарда 260 жаңа аялдаманың 133-і орнатылды. Қалған 127 аялдаманы орнату әлі де жалғасуда.
