Қоршаған ортаны қорғау, табиғатқа деген жанашырлықты жасөспірімдердің бойына ерте бастан сіңірудің маңызы зор. Асанбай Асқаров атындағы Шымкент мемлекеттік дендрологиялық саябағында осы мақсатта тағылымды іс-шара өтті. Бұл туралы Шымкент қаласының Ақпараттық-коммуникациялық орталығы мәлімдеді.
Шымкент қаласы білім басқармасына қарасты № 65 «Балбұлақ» балабақшасының тәрбиеленушілері «Құстарға қамқорлық» ретінде саябақтағы ағаш-бұталарға бірнеше ұяшықтар орнатты. Бір қызығы, онда ұяшықтың қандай құсқа арналғаны жазылған.
Табиғи ресурстар және табиғат пайдалануды реттеу басқармасы ұйытқы болған іс-шарада бүлдіршіндер табиғатқа және құстарға деген қамқорлығын көрсетті. Басқарма басшылығы табиғатты аялауға үлес қосқаны үшін №65 «Балбұлақ» балабақшасының ұжымына өз алғыстарын білдірді.
Сондай-ақ, «Дүниежүзілік тазалық күні» акциясы аясында саябақ аумағында ұйымдастырылған сенбілік іс шарасына басқарма қызметкерлері толықтай атсалысты.Осылайша шымкенттік шенеуніктер қала тұрғындарына табиғатты аялаудың жарұын үлгісін көрсетті. Басқарма басшысының айтуынша аталған игі бастама алдағы уақытта да өз жалғасын табатын болады.
