Шымкент қаласының әкімі Мұрат Әйтенов шаһардағы көпқабатты тұрғын үйлерге лифтлерді жеткізумен айналысатын «Шымкентлифтмонтаж» компаниясының жұмысымен танысты. Қазір Шымкенттегі көп қабатты тұрғын үйлерде 358 лифт бар. Соның 333-і жұмыс істеп тұр. Қалған 25-ін ауыстыру қажет. Бұл туралы Шымкент қаласы әкімінің баспасөз қызметі хабарлады.
Биыл қалада көпқабатты 6 үйдің 12 лифті жаңартылып жатыр. Соның 10-ын осы«Шымкентлифтмонтаж» ЖШС-і ауыстыруда. Қалған екеуін «DOSTAR лифт» ЖШС-і жаңартады. Шымкент қаласының әкімі М.Әйтенов компания басшыларына жұмысты барынша сапалы орындау керектігін ескертті. Сондай-ақ шаһар басшысы жауаптыларға қалада жұмысын жалғастырып тұрған лифтердің жұмысы мен техникалық жағдайын үнемі бақылауда ұстап отыруды, қандай да бір ақау шыққан жағдайда тез арада қалпына келтіруді тапсырды. Өйткені, бұл – тұрғындардың қауіпсіздігі мен жайлы өмір сүруіне тікелей әсер ететін мәселенің бірі.
Айта кетейік, 2021 жылы көп қабатты 13 үйдегі 25 лифт жаңартылады деп жоспарланып отыр.
