Шымкент қаласының әкімі Мұрат Әйтеновтің төрағалығымен төтенше жағдайлардың алдын алу және жою жөніндегі қалалық комиссияның кезектен тыс отырысы өтті. Бұл туралы Шымкент қаласы әкімінің баспасөз қызметі мәлімдеді.
Комиссия отырысында қысқы кезеңге дайындық, жылыту кезеңінде улы газбен уланудың алдын алу мәселелері, сондай-ақ қаланың су тасқыны қаупі бар учаскелерінің мәселелері қаралды.
Жиында сөз алған Шымкент қаласы төтенше жағдайлар департаментінің бастығы Нұрболат Дербісов қысқы кезеңге департаменттің арнайы техникасы дайын екендігін және жеке құраммен дайындық шараларының жоспарға сай жүргізіліп жатқандығын айтты.
Сондай-ақ, қаланың су қоймаларындағы су басу қауіпі бар учаскелерді жоюға бағытталған іс-шаралар талқыланып, әлеуметтік осал отбасылардың үйлеріне газ дабылқаққыштарын алу және орнату мүмкіндігін қарастыру ұсынылды.
Комиссия отырысының қорытындысы бойынша қала әкімі коммуналдық қызмет техникасының әзірлігін тексеру жөнінде тиісті сала басшыларына тапсырмалар жүктеліп, хаттамаға енгізілді.
