Шымкент қаласына арнайы жұмыс сапарымен «NUR OTAN» партиясы төрағасының бірінші орынбасары Бауыржан Байбек келді. Ол қала әкімі Мұрат Әйтеновпен бірге Абай ауданындағы М. Водопьянов көшесіндегі құрылысы аяқталған тұрғын үйдің ашылу рәсіміне қатысты. Бүгінде ондағы тұрғындардың қуанышында шек жоқ. Себебі Водопьянов көшесі №1 «А» көп пәтерлі үйдің құрылысы аяқталды. Бір жыл алдын өртке оранған үйдегі 42 отбасы жаңа баспананың кілтін алады. Бқл туралы Шымкент қаласы әкімінің баспасөз қызметі мәлімдеді.
Тұрғындардың баспана мәселесін шешу мақсатында өрт болған үйдің орнына «Шымкент ӘКК» АҚ арқылы жоба құны 550,1 млн. теңгеге жаңа 5 қабатты 85 пәтерлі тұрғын үй тұрғызылды. Жұмысты мердігер «ОтауСтрой» ЖШС-і атқарды.
Партияның бірінші орынбасары аталған көп қабатты тұрғын үйдің пәтерлерін аралап, тұрғындармен тілдесті. Кездесуде Бауыржан Байбек «NUR OTAN» партиясына сенім білдірген халыққ алғысын айтып, жаңа баспаналардың іші қуаныш пен шаттыққа толуын тіледі.
