Шымкентте жыл басынан бері 1 401 адамға еліміздегі түрлі шипажайларға жолдама берілді. Оның ішінде 1003 зейнеткер, 398 адам мүмкіндігі шектеулі азаматтар. Бұл туралы Шымкент қаласы жұмыспен қамту және әлеуметтік қорғау басқармасына сілтеме жасап Шымкент қаласы әкімінің баспасөз қызметі мәлімдеді.
Сондай-ақ, мүгедектерге арнайы жабдықталған 18 «Инватакси» көлігіне 400-ден астам өтінім қабылданып, қазіргі таңда қызмет көрсетілуде. Ал Ұлы Отан соғысы ардагерлері мен мүгедектеріне, жүріп-тұруы қиын 1-2-ші топтағы мүгедектерге емдеу мекемелеріне және қоғамдық орындарға бару үшін арналған 43 «Әлеуметтік такси» автокөлігіне 420 өтінім қабылданған.
Онымен қоса жыл басынан бері басқарма тарапынан үйде күтім көрсету жағдайында арнаулы әлеуметтік қызмет көрсетуге 52 жолдама беріліп отыр. Одан өзге, осы кезеңде медициналық-әлеуметтік мекемелерде арнаулы әлеуметтік қызмет көрсету үшін 24 жолдама берілген. Мұның барлығы ел Президенті тапсырмасына сәйкес,халықтың тұрмыс-тіршілігін жақсарту мақсатында атқарылып жатқан іс-шаралар.
