Шымкент қаласында көмір қышқыл газынан улану жағдайларының алдын алу мақсатында қала тұрғындарына түсіндірме жұмыстары жүргізіліп жатыр. Бұл туралы Шымкент қаласы әкімінің баспасөз қызметі мәлімдеді.
Атап айтқанда, Әл-Фараби ауданы аумағы жеке тұрғын үй секторында газ қауіпсіздік шараларын сақтау мақсатында аудандық төтенше жағдайлар бөлімі және «ҚазТрансГаз Аймақ» АҚ қызметкерлерімен бірлесе тұрғындарға түсіндірме жұмыстары жүргізді. Тұрғын үй секторын аралау кезінде тұрғындар өрт қауіпсіздігі бойынша сұрақтар қойып, білікті мамандардың кеңестерін алды. Үй иелеріне газ қазандықтары мен жылыту пештерін дұрыс пайдалану жөнінде нұсқаулық парақшалар үлестірілді. Бұл жылыту маусымы кезінде қайғылы оқиғаларды алдын алуға өз септігін тигізеді дейді мамандар. Сондай-ақ мамандар қала тұрғындарына газ қазандықтары мен жылыту пештерін пайдалану кезінде қауіпсіздік шараларын сақтауларын сұрайды.
Егер де, газ құрылғыларынан ақау анықталған болса немесе жағымсыз иіс шықса шұғыл түрде 104 нөміріне хабарласу қажет.
