Шымкент қаласы Еңбекші ауданы әкімдігінің қызметшілері, полицейлер мен санитарлық-эпидемиологиялық бақылау бөлімімен бірлесіп сауда орталықтары, дүкендер мен адам көп шоғырланатын қоғамдық орындарға мониторинг жұмыстарын жүргізді.
Нәтижесінде К.Тленшин көшесінде орналасқан «Olja», Елшібек батыр көшесіндегі «Garden Challet» және Қапал батыр көшесінде орналасқан «Dunyo» мейрамханасында үлкен іс-шара өтіп жатқанын анықтап, нысан иелеріне айыппұл салынды. Бұл туралы Шымкент қаласы әкімінің баспасөз қызметі мәлімдеді.
Карантин талабын елемей жұмысын жалғастырған тек мейрамханалар емес арасында ойынхана да бар. Арнайы топ өкілдері жұмысына тыйым салынған «LOTO CLUB» ойынханасы сағат 22:00 шамасында жұмыс істеп тұрғанын анықтады.
Ойынхана әкімшісінен тиісті түсініктеме алынып, құжаттар аудандық санитарлық-эпидемиологиялық бақылау бөліміне жолданды.
Шымкент қаласы әкімдігі тұрғындардан COVID-19 таралу қаупі жоғары болғандықтан санитарлық талаптарды қатаң сақтауға және қоғамдық орындарда маска тағуға шақырады. Санитарлық талаптарды орындамаған азаматтар заң аясында әкімшілік жазаға тартылатындығын ескертеді.
