Шымкент қаласында іскерлік кездесулер мен халықаралық іс-шараларды ұйымдастыратын MICE(Meetings, Incentives, Conferences, Events) индустриясына көңіл бөлініп отыр. Осы бағытта туризм басқармасы «Kazakh Tourism» Ұлттық Компаниясымен бірлесе қаладағы қонақ үй менеджерлеріне, туристік операторлар мен агенттіктерге арнайы семинар-тренинг өткізді. Бұл туралы Шымкент қаласы әкімінің баспасөз қызметі мәлімдеді.
Аталған семинарда 25-ке жуық компания өкілі туризм саласын дамыту бойынша ақысыз білімін жетілдіруге мүмкіндік алып отыр.
Дәріс барысында халықаралық іс-шараларды дестинацияға тарту, іскерлік кездесулердің негіздерін басқару, сату саласын оңтайландыру және халықаралық ассоциациялардың іс-шараларын тарту әдістері мен замануи трендтер секілді тақырыптар талқыланды.
Туристік индустрия жұмысының жеке, топтық немесе корпоративтік тиімділігін арттыру бағытында сабақ алған мамандар мәдени қаламызда халықаралық жиындарды ұйымдастыруға ықпал етеді. 2200 жылдық тарихы бар Шымкент шахарын туризмнің орталығына айналдыру басты назарда. Аталған шара шахарда туризм саласы бойынша жаңашылдықтар мен заманауи тәсілдерді меңгеруге мол мүмкіндік берді.
