– Еуропа футбол қауымдастықтары одағының (УЕФА) жұмыс топтары бұған дейін коронавирус пандемиясы салдарынан тоқтатылған ресми құрлықтық жарыстардың турнирлік күнтізбесінің түрлі жобаларын ұсынды, деп хабарлайды ҚФФ ресми сайты.
Бейнеконференция түрінде өткен кеңеске УЕФА президенті Александер Чеферин мен Еуропа футбол қауымдастықтары одағының бас хатшысы Теодор Теодорис қатысты. УЕФА құрамына кіретін Еуропа мемлекеттірі өкілдерінің құрамында Қазақстан футбол федерациясының бас хатшысы Азамат Айтхожин болды. Форум қатысушылары COVID-19 індетінің өршуі аяқталған соң еуропалық футбол жарыстарын өткізу бойынша оңтайлы шешім табу үшін құрылған екі жұмыс тобының атқарған іс-шараларының қорытындыларымен танысты. Бірінші кезекте кәсіби клубтық және құрама командалар арасында өткізілетін ресми жарыстар күнтізбесін іске асырудың түрлі мерзімдерін қарастыратын нұсқалар ұсынылған. УЕФА мүдделі тараптарды бұл бағыттағы міндеттемелерін уақытылы орындайтынына сендірді. Кеңес соңында жоғары дивизиондар чемпионаттары мен ұлттық клубтар ойындарында турнир маусымын аяғына дейін жеткізуге кеңес берілді. Сондай-ақ кеңесте қозғалған тақырыптар бойынша ресми шешімдер УЕФА Атқарушы комитетінің алдағы бейсенбі күніне жоспарлаған отырысынан кейін жарияланады.
