Бүгін Шымкент қаласы әкімдігінің ұйымдастыруымен қалалық сенбілік өтті. Қала тазалығын басты назарда ұстаған мемлекеттік қызметшілер қала көшелерін күл-қоқыстан тазалап, ағаш түптерін әктеді. Арнайы көліктер қоқыстарды қала сыртына шығарды. Бұл туралы Шымкент қаласы әкімдігінің баспасөз қызметі мәлімдеді.
Жалпы мегаполис сенбілік үстінде. Қызу түрдегі қыруар еңбектер көшенің шырайына шырай қоса түскендей. Бүгінгі тазалық шарасына қала әкімдігіне қарасты барлық басқармалардан 500-ге жуық адам қатысты. Олармен 45,5 шақырым жол жиектері, 37,3 шақырым ирригация және арық жүйелері тазаланып, 300 текше метрге жуық күл-қоқыс шығарылды. Жұмысқа барлығы 27 техника жұмылдырылды.
Шымкентте тұрмыстық қалдықтарды уақытылы шығару және көпқабатты үйлердің аулалары мен қоғамдық орындардың тазалығы үнемі күн тәртібінен түскен емес.
Айта кетейік, бұған дейін Шымкент қаласының әкімі Мұрат Әйтеновтың бастамасымен ECOSANA экологиялық жобасы қабылданып, қаланың бірқатар жерлерін қоқыстан тазарту жұмыстары белсенді түрде жүргізілген болатын. Ондағы басты мақсат Шымкент қаласын жасыл қалаға айналдыру.
