Шымкент қаласында диспансерлік есепте тұратын азаматтарға ковидке қарсы вакцина салынуда. Созылмалы ауруға шалдыққандарға екпе егу жұмыстары жергілікті тіркелген емханаларында жүргізілуде.
Дәрігерлердің айтуынша, диспансерлік есепте тұратын азаматтардың коронавирусты жұқтыру қаупі жоғары деңгейде. Әрі созылмалы ауруы бар науқастардың басым бөлігі коронавирус инфекциясын ауыр өткереді екен. Сондықтан инфекциядан сақтанудың бірден бір жолы – вакцина салу.
Бүгінге дейін Шымкент қаласына 29 400 доза ковидке қарсы вакцина жеткізілген. Қолданыста – ресейлік «Спутник V» вакцинасы. Инфекцияға қарсы 9598 азаматқа екпе салынды. Екпе алғандардың 4907-і медицина қызметкері, 564-і полицейлер және 2668-і мұғалімдер болса, қалғандары басқа да санаттағы азаматтар.
Айта кетейік, вакцинация тұрғылықты жері бойынша емханаларда жүргізілуде. Екпе салардан алдын азамат міндетті түрде сауалнамаға жауап беріп, ерікті түрде вакцина алатыны туралы келісім береді. Медицина мамандары ковид індетінен сақтанудың ең тиімді жолы екпе егу екендігін ескертеді. Сондықтан барлық қала түрғындарын ерікті түрде вакцина салдыруға шақырады.
