Шымкент қаласында көлік саласын цифрландыру бағытында бірқатар жұмыстар қолға алынған. Бұған дейін қоғамдық көліктерде электрондық билеттеу жүйесі енгізілгені мәлім.
Шаһарда бүгінгі таңда қоғамдық көлік қозғалысының уақытын хабарлайтын арнайы «i-Kolik» қосымшасы әзірленді. Бұл туралы Шымкент қаласы әкімдігінің баспасөз қызметі мәлімдеді.
2021 жылдың 19-20 сәуір күні Playmarket және Apple Store жүйелеріне енгізіліп, смартфондарға бастыруға мүмкіндік пайда болады. Бұл жоба өз кезегінде тұрғындардың қоғамдық көлік қозғалысы туралы хабардар болуына мүмкіндік береді.
Сонымен қатар, қоғамдық көліктерде дауыстық хабарлама енгізу жұмыстары басталады. Байқауға 563 өтініш келіп түскен. Үздік дауысты анықтау жұмысы жалғасуда. Бұл жұмыстар «Цифрлы Қазақстан» мемлекеттік бағдарламасы аясында қоғамдық қызмет түрлерінің халыққа қол жетімділігін оңтайландыру мақсатында іске асырылып жатқан жобалар.
Естеріңізге сала кетейік, өткен жылы Шымкент қаласында қоғамдық көліктерде «Төлем» электрондық төлемақы жүйесі іске қосылған болатын. Бүгінде аталған жүйе оң нәтижесін беруде.
