Режиссер — таспаға жазылған материалдың басты компоненттері дауыс, оқиғаның дыбыстық бейнесі, музыка, шу секілді көркемдік элементтерді біріктіріп, үйлестіріп отыратын бірден-бір маман. Байқасаңыз режиссерлік қызмет қаншалықты қиын болғанымен — соншалықты елеусіз қалып жататыны бар. Бүгінгі кейіпкеріміз де театрға қосқан үлесі орасан, бірақ аты көп атала бермейтін режиссер Самат Алтай жайында болмақ.
2001 жылы Т.Жүргенов атындағы Қазақ мемлекеттік Өнер академиясын «Театр және кино актері» мамандығы бойынша тәмәмдап, 2001 жылы алғаш қызмет жолын Қостанай облыстық қазақ драма театрында «Актер-режиссер» қызметінен бастап, 2011 жылы Шымкент қалалық әзіл-сықақ және сатира театрында сахна әртісі және режиссеры болып жұмысын жалғастырады.
Самат Тұрсынбекұлы 22 жылда театр өнерінде 74 рөлді сомдап, 46 спектакль, 23 ертегі мен өзінің авторлық 11 пьесасының қойылымдарын сахналаған. Бұдан бөлек, 42 мәдени іс-шараны ұйымдастырған.
Режиссерлік жолында: Ә.Табылдының «Арыстанның айласы» ертегісі, өзі жазған «Абайламайсыз ба, Аяз ата!»-атты жаңа жылдық ертеңгілігік, тағы да сол өз қаламынан туған «Өзіңе өмір сыйла» атты шығармасы, Р.Ыбраеваның «Сиқырлы кітап», С.Алтай «Көңілді көбелектер» ертегісі сынды көптеген туындыны сахналады.
Осынау қажырлы еңбегінің арқасында Қазақстан Ассамблеясы 25 жыл төсбелгісімен, ҚР Мәдениет және спорт министрлігі Алғыс хаты, Халықаралық, Республикалық театр фестивалі лауреаты және Халықаралық «ТҮРІКСОЙ» ұйымы Алғыс хатымен марапатталған.
Сондай-ақ, «Шымкентнаме» новелла, «Актер әліппесі» трактат, «Өзіңе өмір сыйла» әңгіме, «Абайды оқы, әлем таны» шағын пьесаларының авторы, Педагогика және психология магистрі. Өз саласындағы осы деңгейге ізденімпаздығы мен еңбектің арқасында жеткен Алтаев Самат Тұрсынбекұлының қазақ өнерінде ашар жаңалығы алда деп білеміз.
