Шымкент қаласында санитарлық тазалық жұмыстары тұрақты назарда. Барлық аудан аумағында көше бойын, аулаларды, саябақтарды, су арналарын тазалау жұмыстары ұдайы жүргізілуде. Бұл туралы Шымкент қаласы әкімдігінің баспасөз қызметі мәлімдеді.
«Build Stroi» ЖШС қызметкерлері қаланың 4 ауданында тазалық жұмыстарын атқаруда. Оған 40 техника, 350 адам жұмылдырылған. Атап айтқанда, мекеме тарапынан Темірлан тас жолы, Қатын көпір, Қошқар ата аумағы ретке келтірілді.
Сондай-ақ, «Атырау групп» ЖШС 3 техника және 16 қызметкерімен күнделікті су арналарын тазалау жұмыстарын жүргізуде. Осылайша еліміздегі үшінші мегаполис саналатын Шымкент қаласын таза қалаға айналдыру алға қойған мақсаттардың бірі. Өйткені шаһарға бүгінде еліміз бен қатар көршілес мемлекеттерден де келуші қонақтар қатары көп.Яғни туризмді дамытудың ең басты талаптарының бірі қаланың тазалығы мен қызмет көрсету саласының жоғары деңгейді болуы. Сондықтан қала әкімдігі тұрғындарды тазалыққа үлес қосып, қоршаған ортаны қорғауға шақырады.
