Шымкент қаласында 90-ға жуық экспорттаушы және 150 трейдерлік компания бар. Өткен жылы Шымкент қалалық кәсіпкерлер палатасы 21 кәсіпорынға қолдау көрсетті. Мәселен, «Шымкентмай» АҚ, «Газпромнефть битум», «Бал текстиль», «Химфарм», «Шымкент сабын», «Юг Агро-С», «Taza Onim», «AgroFood Kazakhstan», «AIIG Қазақстан» сынды кәсіпорындар «Kazakh export» АҚ-ның қаржылық-сақтандыру құралы арқылы 2,4 млрд. теңгеге қолдау тапқан. Бұл туралы Шымкент қалалық кәсіпкерлер палатасының директоры Н.Қабыштаев мәлімдеді.
Бұдан басқа, 12 кәсіпорын «Қазақстандық индустрия және экспорт орталығы» АҚ-ның көмегімен 444,7 млн теңге болатын шығындарын жапқан. Бүгінгі таңда палата тарапынан Өзбекстанның акциздік тауарларына кері шаралар орнату, жүнге экспорттық баж салығын алып тастау, Өзбекстан мен Түркияға мал шаруашылығы өнімдерін экспорттаудағы кедергілерді алып тастау секілді мәселелер көтерілуде. Өткен жылы импорттан гөрі мына салалардың өнімдері сатып алынды: жиһаз, жеңіл өнеркәсіп, тамақ өнеркәсібі, құрылыс, машина жасау, химия өнеркәсіптері. Бұл бойынша 2,6 млрд. теңге игерілсе, соның 631 млн теңгесі импорт, 2 млрд теңгесі отандық тауар өндірушілердің өнімі.
