2020 жылы «Бастау бизнес» жобасы бойынша 2 820 азамат оқып, тиісті сертификатын алды. 962 үміткерге қаржылай көмек берілді. Оның ішінде «Еңбек» бағдарламасы арқылы 942 азамат грантқа (555 600 теңге) ие болды. Сонымен қатар «Бизнестің жол картасы 2025» арқылы 12 үміткер грант (5 млн, тг) жеңіп алса, 8-і несиеге (101 млн.тг) қол жеткізді. Бұл туралы Шымкент қалалық кәсіпкерлер палатасының директоры Н.Қабыштаев мәлім етті.
Биыл Шымкент қаласындағы «Бизнеске арналған Үкімет» фронт-офисінде кәсіпкерлерге арналған 12 онлайн семинар-тренингтер ұйымдастырылды. «Бастау бизнес» жобасына қатысушыларды табысты жобалармен таныстыру үшін белсенді кәсіпкерлердің қатысумен «Каравай» – тамақтану желісі мен «Art School» – тігін цехында шеберлік семинарлары өткізілді.
2021 жылы «Бастау бизнес» жобасы арқылы оқуға ниет білдірушілердің саны біршама артып отыр. Алайда, қалаға бөлінген грант (600 грант) пен үміткерлердің арасында несие алуға ниет білдірушілердің аздығын ескере отырып, биыл 2500 азаматты оқыту жоспарлануда.
