Шымкент қаласында биыл 7 елдімекен сапалы электр қуатымен қамтылады. Жергілікті халық сапалы жарық тұтынуы үшін қазір 3 қосалқы станция мен 16 елдімекенде құрылыс жұмыстары жүргізіліп жатыр. Шет елдімекендердің инфрақұрылымын жақсарту мәселесі бүгінде билік өкілдерінің тікелей назарында. Ал мұндай иігілікке шаһар аумағына кейіннен қосылған Сәуле елдімекенінің тұрғындары алдағы жылы қол жеткізеді. Қазір шағын ауданда электр желілері тартылып жатыр.
Елдімекенге осыдан 7-8 жыл бұрын қоныстанған тұрғындар кезінде электр бағаналарын өз қаражаттарына қойдыртып, жекенің меншігіндегі жарықпен күнелтіп келеді. Құрылыс жұмыстары кестемен жүрсе, мұндағы жұрт келер жылы сапалы жарыққа қол жеткізеді. Сондай-ақ жыл соңына дейін Ақжар, Ынтымақ-2, Айкөл, Игілік, Тәуелсіздікке -20 жыл, Жалын, Достық тұрғын алабындағы құрылыс жұмыстары да аяқталып, халық сапалы электр қуатына қол жеткізеді. Салаға жауаптылар келер жылға дейін 21 мыңға жуық обонентті сапалы электр қуатымен қамтып бұл көрсеткішті 97%-ға арттырамыз дейді. Әлеуметтік маңызы зор нысандардың құрылысы қала басшысының қадағалауында.
