Шымкент қаласының Әл-Фараби ауданы «Сәуле» шағын ауданының тұрғындарына Мемлекет басшысының «Халық бірлігі және жүйелі реформалар – ел өркендеуінің берік негізі» атты Қазақстан халқына Жолдауын насихаттау жиыны өтті.
Шымкент қаласының әкімі Мұрат Әйтенов іс-шараға қатысып, Президент Жолдауының басым бағыттарын атап берді. Сондай-ақ, жиынға ардагерлер, қалалық мәслихат депутаттары, құқық қорғау органдарының басшылары, жастар, БАҚ өкілдері және тұрғындар қатысты.
Қала әкімі тұрғындарға шағын аудандағы 276 және 195 орамдардың инфрақұрылым мәселері бойынша атқарылған жұмыстардан хабардар етті. Мұрат Дүйсенбекұлының мәлімдеуінше, өткен жылы 276 орамда 350 метрге жуық су құбырының қазба жұмыстары жүргізілген болатын. Қазіргі таңда орамды толықтай ауыз сумен қамту үшін 532,5 млн. теңге бөлініп, құрылыс жұмыстары биыл қарашада аяқталады деп жоспарланған.
Сапалы электр жүйесі бойынша 25 бағана, 2 шақырым желілер және 160 киловаттық трансформатор орнатылды. Электр жарығымен толық қамтамасыз ету мақсатында 982,4 млн теңге бөлініп, бұл жұмыстар 2022 жылдың І тоқсанында аяқталады.
195 орамда инфрақұрылыммен қамтамасыз ету жұмыстары 2020 жылы жүргізілген. Тұрғындарға электр жарығы, ауыз су берілді. Табиғи газбен қамту үшін 298,7 млн теңге бөлініп, жұмыстарды осы айдың соңында аяқтау жоспарлануда.
