Ауыл шаруашылығы : Шымкентте егемендік жылдарында құс саны 47 есеге артқан

Ел Тәуелсіздігінің 30 жылында қол жеткізген жетістіктер аз емес. Қай саланы алып қарасақ та өсім барын көреміз. Солардың ішінде ауыл шаруашылығы саласын ерекше атап өту керек. Әсіресе құс шаруашылығы жедел қарқынмен дамып келеді.Шаһарда құс шаруашылығы 1997 жылдан бастап нақты қолға алына бастаған. Сол шақта 24 мың құс болса, қазір оның саны миллионнан асып кетті. Яғни құс саны 47 есеге артқан. Сонымен бірге ауыл шаруашылығы өнімдерінің көлемі де отыз жылда әжепәтеуір ұлғайған. Мәселен 90-жылдардың бас кезінде бар-жоғы 0,3 мың тонна ет өндірілсе, биыл оның көлемі 9,1 мың тоннаны құрап отыр. Тәуелсіздік кезеңінде ет өндірісі 30 есеге бір-ақ шарықтаған. Сол секілді сүт өндірісі де 1991 жылы 2,1 мың тоннадан 47,2 мың тоннаға өскен. Шымкентте 1998 жылы 2,3 млн. дана жұмыртқа өндіріліпті. 2001 жылы оның көлемі 2,7 миллионды құраса, он жыл аралығында жұмыртқа өндірісі 161,9 млн. данаға ұлғайған. Небәрі 23 жыл ішінде оның көлемі 70 есеге артып отыр.