Тұрғындар саны жылдан-жылға артып келе жатқан республиканың үшінші мегаполисін азық-түлікпен қамтамасыз ету бірінші кезекте тұрған мәселе. Бұл туралы Шымкент қалалық ауыл шаруашылығы және ветеринария басқармасының басшысы Асқар Қаныбеков мәлімдеді.
Оның айтуынша, шаһар өзін-өзі азық-түлікпен қамтамасыз етуі тиіс. Осы орайда басымдық ауыл шаруашылығы өнімдерін терең өңдеу саласына беріліп отыр. Яғни өңірде агро-индустриалды аймақтар құрып, заманауи технлогияларды пайдалана отырып, өнім көлемін арттыру. Осы мақсатта қала аумағында екі агро-индустриалды аймақ құрылуда. Оның алғашқысы жылыжай кешінін дамытуға арналса, екіншісі ауыл шаруашылығы өнімдерін терең өңдеуге арналған. Қайнарбұлақ тұрғын алабында орналасқан «Бозарық» тамақ өнеркәсібі индустриалды аймағында 22 млрд.теңгеге 21 жоба іске асырылады. Және 1,8 мыңнан астам тұрақты жұмыс орнын ашу жоспарлануда. Биыл І кезеңге сәйкес жалпы құны 6,7 млрд. теңгені құрайтын 6 жоба қолға алынбақ. Соның нәтижесінде 14,6 мың тонна ет, 47,4 мың тонна сүт, 165 млн. дана жұмыртқа өндірісіне қол жеткіземіз. Ал егін шаруашылығы бойынша 70 мың тонна ауыл шаруашылығы өнімі өндіріліп, жалпы өнім көлемі 37 млрд теңгені құрайтын болады.
