Ауыл шаруашылығы қала экономикасының драйвері

Ауыл шаруашылығы өнімдерінің өндірісі, оларды сақтау мен саудаға шығару жұмыстары қажырлы еңбек пен жұмыс күшін талап ететі түсінікті. Сондықтан бүгінгі таңда бұл салада мыңдаған адам тер төгіп еңбек етуде. Тіпті қала шетіндегі елді мекен тұрғындары есігінің алдына егін егіп, қорасында мал бағып, сол шағын шаруашылықпен-ақ отбасылық бюджеттің бір бүйірін қомпайтып отыр. Сонымен қатар агросаланың дамуы жалпы сауда нарығындағы белсенділіктің артуына оң әсерін тигізуде. Сандарды сөйлетсек Шымкент қаласында 1991 жылы бөлшек саудадағы тауар айналымының жалпы көлемі 2,3 млрд.теңге болса, 2020 жылы бұл көрсеткіш 414,6 млрд.теңгені құрады. Бұдан бөлек көтерме сауда айналымының жалпы көлемі 1995 жылы 266,6 млрд.теңгені құраса, өткен жылдың қаңтар-желтоқсан айларындағы статистикалық мәлімет бойынша ол 893,1 млрд.теңгеге дейін өскен. Сарапшылар бұл қала аумағында сауда саласын дамытудағы шаралардың оң бағытта екендігін және көршілес өңірлер арасында, сондай-ақ алыс-жақын шет мемлекеттермен тауар алмасудың жоғарғы деңгейде жүріп жатқандығын көрсететінін алға тартады. Сонымен бірге, соңғы жылдары қаламызда бой көтерген ірі сауда желілері, ойын-сауық орталықтары, базарлар және ішкі сауда нысандарының да жалпы экономикаға, соның ішінде ауыл шаруашылығы саласына қосар үлесі жоғары болып тұр.