Шымкент : Экономика өсімі қала инфрақұрылымына қарқын берді

Елбасы Нұрсұлтан Әбішұлы Назарбаевтың Жарлығымен 2018 жылы Шымкентке республикалық қала мәртебесі атағы берілген болатын. Бұл тарихи шешім Шымкенттің тынысын ашты. Экономика өсімі қала инфрақұрылымына да қарқын берді. 2019-2021 жылдары шаһарда жалпы ұзындығы 853,5 шақырым жол төселді. Бұрын мұнша жол 10 жылда салынатын. Биылды қоса есептегенде, соңғы үш жылда, 18 тұрғын алабына ауыз су қосылып, 60 мың тұрғын таза су тұтынып отыр. Үш жылда 7 тұрғын алабы табиғи газға қосылып, 29 500 адам қызығын көріп отыр. Нәтижесінде, биыл жыл соңында ауыз сумен қамту деңгейі – 98 пайызға, газбен қамтамасыз ету – 93 пайызға, ал сапалы электрмен қамту көрсеткіші 97 пайызға жететін болады. Жалпы, 2023 жылға дейін халық 100 пайыз сапалы ауыз суға, 100 пайыз табиғи газға, 2025 жылға дейін 100 пайыз сапалы электр қуатына қосылады, – деген еді Мұрат Әйтенов.
Шаһар басшысының мәлімдеуінше, тұрғындарды сапалы ауыз сумен қамтамасыз ету үшін 3 магистралды су құбыры, 10 елдімекенге ауыз су құбыры, 3 магистралды кәріз құбыры және 16 ішкі орамдық нысан, табиғи газ бойынша №3 АГРС және 2 магистралды, 11 елдімекенге газ құбыры, 3 қосалқы электр станциясы мен 15 елдімекенде ішкі жүйенің құрылысы жүруде.