Үшінші мегаполистің «Асар» шағынауданында физика-математика бағытында тереңдетіп білім беретін жекеменшік «Intellect» лицейі ашылды.
Заманауи үлгіде бой көтерген 600 оқушыға арналған мектепте физика-математика бағытында тереңдетілген білім берумен қатар, онда жалпы пәндер бойынша қосымша сабақтар жүргізіледі. Сонымен бірге, білім алушылар шахмат, домбыра, тігін үйірмелерінде өздерінің ой-өрістерін дамыта алады. Лицейдің екі оқу ғимараты, акт залы, 23 оқу бөлмесі бар. Медициналық пунктпен, кең асханамен қамтылған.
Жалпы, мегаполисте білім саласында инвесторлардың көмегімен жекеменшік мектептер көптеп салынуда. Бұл деген мемлекет үшін мектептегі орын тапшылығын азайтады, білім сапасын көтеруге, мұғалімнің мәртебесін де арттыруға мүмкіндік береді. Ең бастысы, білім беру саласында бәсекелестікті арттыруға ықпал етеді.
Қалада бой көтерген лицейдің ашылу салтанатына Шымкент қаласы әкімінің бірінші орынбасары Шыңғыс Мұқан, қалалық білім басқармасының басшысы Жанат Тәжиева және Біріккен Араб Әмірліктерінің «Ummet» қоғамдық қорының өкілі Салих Али Абдрахман Бухалид қатысты.
Осылайша, тәуелсіздіктің 30 жылдығы қарсаңында Шымкент қаласында болашақ елдің білімді, бәсекелестікке қабілетті жастарын тәрбиелейтін тағы да бір білім ошағы бой көтеріп, жұмысын бастап кетті.
