Түркістан облысы, Келес ауданына қарасты Біртілек ауылдық округінің тұрғыны Искендер Павлиев үй жағдайында тауыс құсын өсірумен айналысуда. Шаруа павлин өсіруді осыдан 7 жыл бұрын қызығушылықпен қолға алып, бүгінде санын 30-ға жеткізіпті.
– Бастапқыда бір дана тауыс құсын сатып алып, оны егжей-тегжейлі зерттедім. Жергілікті климатқа сай келетінін түсінген соң көбейтуді мақсат еттім. Бұл құстың күтімі ерекше. Өзімізде өсетін жүгері дақылын беремін. Үнемді. Айтарлықтай егін дақылдарына зияны жоқ. Сұраныс жоғары болуына қарамай жұмыртқа күйінде сатпадым. Алдағы уақытта кәсібімді кеңейтуді жоспарлап отырмын, – дейді шаруа.
Тауыс құс – біздің планетамыздағы ең көрікті және әдемі құстардың бірі. Бұл қарапайым үй тауықтарының туысы, қырғауыл тұқымдасына жатады.
Шаруаның айтуынша, тауыс құсы өз қауіпсіздігін қатаң сақтайды екен. Ит пен құсқа оңайлықпен ұстатпайтын құстың әр басын 40-50 мың теңгеге саудалауда.
Тауыс құсын бағудың қыр-сырын үйренген шаруаның екі ұлы да ауыл шаруашылығы саласында еңбек етеді. Отбасылық кәсіпті қолға алған тұрғындар Әзірбайжан ұлтының азаматтары. Олар егін егіп, тауық, күрке секілді құс түрлерін өсіруде. Одан бөлек, 40 жәшік бал арасын бағып, жылына 1 тонна өнім алуда.
Тауыс өңір үшін таңсық құс болатын. Үй құсының бұл түрін қазір «Рахманберди» шаруа қожалығының басшысы Рахманберді Өсербаев алғашқылардың бірі болып өсіруді қолға алып отыр. Сонымен қатар ол қырғауылдың 7 түрі, тауықтың 5 түрі, кептер, түйеқұс, азияттық кекілік, қазы, үйректің 2 түрі, күрке, бөдене бағумен де айналысады.
Сырттан алып келінген құстар қолға үйретілген. Күтімі ерекше тауыс жылына 6 рет жұмыртқалайды. Одан өзге, бұл құс көктем айларында ғана ерекше билеп, өнер көрсетеді. Алғашында 2 тауыс құсын сатып алып, жерсіндірген кәсіпкер оны көбейтіп санын 40-қа жеткізген. Сондай-ақ құсқа қызығушы азаматтардың сұранысына сәйкес, 30 шақты тауысты сатып, пайдасын да көріпті.
Алдағы уақытта жеке кәсіпкер құс шаруашылығын кеңейтумен қатар, балық шаруашылығын дамытуды да жоспарлап отыр.
