МАҚТААРАЛДА ҚЫЗЫЛШАҒА ҚАРСЫ ІС-ШАРАЛАРДЫ ЖҮРГІЗУ БОЙЫНША ШТАБТЫҢ ОТЫРЫСЫ ӨТТІ

Елімізде қызылша ауруымен ауыратындардың саны азаймай тұр. Оның ішінде Мақтаарал ауданында да жағдай күрделі. Осыған байланысты қызылшаға қарсы санитариялық-эпидемиологиялық және санитариялық профилактикалық іс-шараларды жүргізу бойынша арнайы штаб құрылып, бүгін аталған штабтың кезекті отырысы өтті.
Қызылша ауруы бойынша эпидемиологиялық жағдай және қызылша ауруын жаппай имунизациялау мәселесі жөнінде өткен мәжілісте аудандық санитариялық-эпидемиологиялық бақылау басқармасының басшысы Мұхит Әшірепиев баяндама жасады.
Ауданда қызылша ауруы бойынша 105 күдікті жағдай тіркелген. Оның ішінде 92 науқастан сынама алынып, оның 74-інен оң нәтиже, 18-інен теріс нәтиже анықталған.
Күдікке ілінген 105 науқастың 31-і ғана қызылшаға қарсы егу алғаны расталып отыр. Сондықтан, аудан тұрғындары арасында екпе жұмыстарын белсенді жүргізу өте маңызды екенін басқарма басшысы атап өтті.
Мәжілістің күн тәртібіне сәйкес аудандық «Мырзакент» және «Атакент» ауруханаларының өкілдері де қосымша баяндама жасап, науқастардың қазіргі ахуалы жөнінде кеңінен ақпараттар берді.
Аудан әкімінің орынбасары, штабтың төрағасы Алтын Ешанқұлова санитариялық-эпидемиологиялық және санитариялық профилактикалық іс-шараларды жандандыру керектігін жеткізіп, жиынды қорытындылады.
Қызылша ауруының балалар арасында көптеп таралудың алдын алу жұмыстары ретінде елді мекендерде жаппай иммундау яғни вакцина, екпе егу жұмыстары жүзеге асырылуда. Түркістан облысында 2024 жылдың басынан бері қызылша ауруына шалдыққан 299 науқас тіркелген. Оның ішінде 81,2%-ы — 14 жасқа дейінгі балалар, 56-сы — ересек адам. Қызылшамен ауырғандардың басым бөлігі — екпе салдырмағандар. Айта кетерлігі, облыс әкімінің орынбасары Бейсен Тәжібаевтың төрағалығымен «Түркістан облысында қызылша ауруын азайту және одан әрі таралуын болдырмау жөніндегі өңірлік штабының құрамы» бекітілген. Қазіргі таңда облыстағы медициналық ұйымдарда жұқпалы ауруларға арналған төсек-орын саны — 625. Эпидемиологиялық ахуалға байланысты қосымша 407 төсек-орын ашылып жалпы 1 032 төсек-орын бар.