Инфекциядан қорғаудың жалғыз жолы – вакцинация. Иммундау жоспарлы түрде «Ұлттық профилактикалық егу күнтізбесіне» сәйкес төмендегіше жүргізіледі:
-Балалар 12 айлық кезде және 6 жаста екі рет;
-18 жастан 35 жасқа дейінгі ауырмаған және екпе алмаған, сонымен қатар, бір рет қана егілген ересектер егуге жатады;
-36 жастан 55 жасқа дейінгі тәуекел тобына жататын, әсіресе медициналық және білім беру мекемелерінің, сауда ұйымдарының, көлік және коммуналдық шаруашылықтың және әлеуметтік саланың қызметкерлері, вахталық әдіспен жұмыс істейтін адамдар, мемлекеттік бақылау органдарының қызметкерлері егуге жатады.
Егер өзіңіз немесе балаңыз ауырып қалса, Сіз келесі әрекеттерді жасағаныңыз дұрыс:
-Шұғыл медициналық көмекке жүгіну;
-Емханаға өз бетіңізше бармаңыз, дәрігерді күтіңіз;
-Дәрігер келгенге дейін басқа адамдармен байланысын барынша азайтыңыз;
-Жөтелгенде және түшкіргенде ауыз бен мұрынды орамалмен немесе майлықпен жабу, қолды сабынмен жиі жуу;
-Тыныс алу органдарын қорғау құралдарын қолданыңыз (мысалы, маска немесе дәке таңғыш);
-Өзін-өзі емдеуге болмайды!
Қызылша – бұл өте кең түрде таралған инфекциялық ауру. Көбінесе балаларда кездеседі. Оның белгілері дене қызуының көтерілуі мұрынның, көздің және тамақтың шырышты қабығы қабынып, теріде бөртпелер пайда болады. Қызылша – қазіргі таңда ең жұқпалы аурудың бірі болып табылады. Бұл 100 пайыз жұқпалы ауру, яғни бұрын қызылшамен ауырмаған немесе егілмеген адам қызылшамен ауырған адаммен байланысқа түссе, жұқтыру қауіпі туындайды.
Жұқпалы індеттің алдын алу мақсатында басқарма мамандары 14 қаңтардан бастап теміржол мекемелері арасында 4 семинарлық кеңес, 12 лекциялық жұмыс өткізіп, 6 нысанға жаднамалар, парақшалар таратып үлгерді. Сонымен қатар, Атырау – Сағыз, Атырау – Құлсары, Атырау – Аққыстау бағыттарындағы пойыз жолаушыларын да жұқпалы індеттен сақтандыру шараларын алып, түсінік жұмыстарын жандандыруды жоспарлап отыр.
Аурудың себептеріне келер болсақ, инфекция ауа жолы арқылы беріледі. Вирус сыртқы ортаға сөйлеген кезде түкірікпен, жөтелген, түшкірген кезде бөлінеді. Вирустың таралуы сыртқы ортаның тұрақсыздығына қарамастан, ауа толқынымен ғимараттың вентиляциялық жүйесі арқылы таралған жағдайлары белгілі.
Қызылшаның белгілері. Бұл аурудың инкубациялық кезеңі жұқтырғаннан кейін бірінші белгілері пайда болғанға дейін, яғни 7 күннен 14 күнге дейін созылады. Есте сақтайтын ең маңызды жайт ауру бөртпе шығудан басталмайды, ол суық тию белгілерімен басталады: дене қызуының 38-40 градусқа көтерілуі, әлсіздік, тәбеттің болмауы, құрғақ жөтел, мұрынның бітуі. Кейініректе конъюнктивиттің (көздің шырышты қабығының қабынуы) пайда болуы. Шамамен бірінші белгілердің шыққанынан 24 күннен кейін беттің шырышты қабығының(азу тістерінің қарсысында)ұсақ ақ дақтар пайда болады. Аурудың 3-5 күні ашық түсті бір-біріне өзара ұқсап кететін дақтар пайда болады. Ең алдымен олар құлақтың артында және маңдайда, содан кейін тез арада бет, мойын, дене және аяқ-қолға таралады. Ұсақ қызғылт дақтар тез арада үлкейіп, формасын өзгертіп, бір-біріне қосылып кетеді.
Қабыну балаларда 5 жасқа дейін, ал 20жастан асқандарда жиі дамиды. Ең көп тараған түрі ортаңғы құлақтың қабынуы(отит), соқырлық, бронхтық пневмония, мойын лимфоузолдарының қабынуы, ларингит, энцефалит. Қызылшаның дамуын байқаған сәтте кешіктірмей дәрігерге қаралу керек.
Асқынбай тұрғандағы қызылшаның белгілерін емдеу үшін төсекте жату режимі, суды көп ішу, қызуын түсіретін, тұмау және тамақ ауруын, қақырықты түсіретін препараттар мен витаминдерді қабылдау. Ал қызылшаның асқынған түрін емдеу стационар жағдайында жүргізіледі.
