Түркістан облысының әкімі Дархан Сатыбалдының әр аудан аумағынан шахматты дамыту туралы арнайы тапсырмасына сәйкес Жетісай аудандық мәдениет, тілдерді дамыту, дене шынықтыру және спорт бөліміне қарасты «Жетісай спорт клубы» КММ мен «Жетісай шахмат федерациясының» ұйымдастыруымен ерлер мен әйелдер арасында аудандық біріншілік өтті.
Бүгінде спорт түрінің бренд ойындарының біріне айналған шахмат ойынына 50-ден астам тұрғын қатысып, өзара мықтыларды анықтады.
Аталған шараға аудандық мәдениет, тілдерді дамыту, дене шынықтыру және спорт бөлімінің басшысы Еркебұлан Сейдалиев қатысып, байрақты бәсекенің мақсаты жастарды спортқа баулу, бұқаралық спортты дамыту, салауатты өмір салтын насихаттау, зияткерлік пен шахматтан жаңа таланттарды анықтау екендігіне тоқталды.
9 турдан тұратын біріншілікте жеңімпаздар ерлер, әйелдер және 60 жастан асқан қатысушылар арасында анықталып, ұйымдастырушылардың дипломдары мен кубоктарына ие болды.
Айта кетейік, бүгінде ауданда шахмат ойынын дамыту мақсатында облыстық дене шынықтыру және спорт басқармасының қолдауымен №1 балалар мен жасөспірімдер спорт мектебіне 4 штат жаттықтырушы, аудан әкімдігінің қолдаумен «Жетісай спорт клубы» КММ-не 2 штат жаттықтырушы лауазымдары берiліп, шахмат үйірмелеріне қатысатындардың саны 150-ге жуықтаған.
Қосымша ақпарат, биыл Түркістан облысында 35 мың бала ақысыз демалыс орындарына барады. Бұл тізімде әлеуметтік осал топтағы бүлдіршіндер мен аз қамтылған отбасылардың балалары бар. Оның ішінде, Түркістан қаласындағы 1 500-ге жуық оқушы демалыстарын арнайы бассейндерде өткізеді. Бұл мақсатта Түркістан қалалық төтенше жағдайлар басқармасы мен қалалық білімі бөлімі шаһардағы 7 нысанмен меморандум жасаған.
Облыстағы 1-10 сынып оқушыларының жалпы саны – 467 766. Оларға жаз мезгілінде 31 сауықтыру лагері қызмет көрсетеді. Бүгінде Түлкібас, Төлеби, Мақтаарал, Сайрам аудандарындағы 10 лагерь өз жұмысын бастап кеткен. Оларға жалпы саны 2 464 бала 1 ауысымға қабылданған. Барлық маусымдық жазғы сауықтыру лагерьлерінің ашылуы маусым айына жоспарланған. Маусым айының 10-на дейін 15 жазғы сауықтыру лагері ашылады деп күтілуде.
