Журналистикаға жолдама

Республикалық «Жас тілшілер» форумын өткізуді дәстүрлі шараға айналдырған әл-Фараби атындағы Қазақ ұлттық университетіне биыл да еліміздің түпкір-түпкірінен 60-тан астам талапкер жиналды.

Болашақ журналистердің шығармашылығын шыңдап, жолдама беретін «Жас тілшілер» форумының шежіресі тереңде жатыр. Алғаш республикалық «Жас тілшілер» слеті 1975 жылы мамыр айында өткен еді. Оның бастауында О.Сүлейменов, Ф.Оңғарсынова, Д.Стамбеков, Ш.Смаханұлы сынды танымал ақын-жазушылар тұрғаны белгілі.

Соңғы жиырма жылда жаңа форматта, заманауи үлгіде өтіп жүрген «Жас тілшілер» форумы биыл да болашақ журналистер үшін жаңа бағдарламаларымен ерекшеленді. Форумның ашылуында журналистика факультеті Баспасөз және электронды БАҚ кафедрасының меңгерушісі, профессор Гүлмира Сұлтанбаева мен аға оқытушы Серік Жұмабекұлы қоғамдағы журналистің рөліне тоқталып өтті.

«Жас тілшілер» форумы барысында газет тілшісінің жұмысы туралы белгілі қаламгер-журналист Жүсіпбек Қорғасбек, телевизиядағы қыр-сырына Жаңылхан Асылбекова, журналисика негіздері бойынша Берікбол Төлеген шеберлік-сыныптарын өткізді.

Форум соңында ең үздік шығармашылық жұмыстар марапатталды. «Ең үздік жас тілші – 2024» қорытындысы бойынша бас жүлдеге «Ұлан» газетінің жас тілшісі, Абай облысы Семей қаласындағы №11 мектеп оқушысы Диана Ағзамованың жұмысы лайық деп танылды.

Форум соңында әл-Фараби  атындағы ҚазҰУ журналистика факультеті жеңімпаздарға сыйлықтар үлестірді. Форум жұмысына онлайн фор­мат­та­­ қатысқан Мәдениет және ақпа­рат ми­­­нис­трлігі БАҚ саласындағы мем­ле­кет­­­тік саясат департаментінің директо­ры Қай­нар Ахетов, журналистика мен цифр­­лы технологияны тығыз қа­рым-қа­­ты­­наста дамыту сала алға қой­ған ма­ңыз­ды міндеттердің бірі екенін ата­­­ды. Ха­лық­аралық ұйымдар мен зерт­­­­теу уни­вер­ситеттерінің медиа және ком­­­­му­ни­кация саласының өкілдері қа­­тыс­­­­қан іс-шарада жасанды интеллект дә­уі­­­ріндегі этикалық барометр, де­­зин­фор­­­­ма­циямен күрес: жасанды ин­тел­­лек­­­­тінің журналистикадағы рөлі, ней­ро­­­­же­лілер және журналистика: таяу бо­­­ла­­­­шағы, қатерлер мен болжамдар деп атал­­­ған арнайы секциялар жұмыс істеді.

«Келешекте журналистердің робот көмекшісі пайда болады. Ол түсірілген видеоны монтаждауға, сапасын тексеруге, мәтінде редакциялауға, тіпті зерттеу жүргізуге қолұшын тигізеді. Түсірілім кезінде робот көмекші, робот оператор жүруі ықтимал. Дамыған елдерде телестудиялық хабарларды роботтар түсіре бастағанына біраз жылдың жүзі болды. Жаңа мүмкіндіктерді игеру үшін цифрлық технологияларды меңгерген журналист мамандарға сұраныс артады», дейді жас ғалым Олжас Есенбай.