«AMANAT» партиясы Шымкент қалалық филиалы жанындағы Экологиялық кеңес Еңбекші ауданында көшпелі жиын өткізді. Бұл іс-шараға партия филиалы төрағасының орынбасары Ербол Байқонысов, Жайлы ортаны дамыту басқармасы басшысының орынбасары Мұрат Абдрахманов, Экологиялық кеңестің төрағасы Жеңісбек Тұрғанов, мәслихат депутаты Байкен Әшірбаев және кеңес мүшелері қатысты.
Жиынның негізгі мақсаты — партияның сайлауалды бағдарламасының орындалу барысын бақылау және оның жүзеге асырылуына қолдау көрсету болды. Осы мақсатта жұмысшы топ Маятас елдімекені маңындағы Бадам өзені жағалауын нығайту жұмыстарымен танысу үшін арнайы барып, атқарылып жатқан жобаларды мұқият бақылап шықты.
Жоба аясында Бадам өзенінің жағалауына монолитті темірбетон құрылыс материалдары орнатылып, су арнасының бұзылмауы үшін барлық қажетті шаралар қолға алынған. Күрделі құрылыс жұмыстары 9 шақырым аумақты қамтып, өзеннің су арнасын сақтап қалуға және су тасқынының алдын алуға мүмкіндік берді. Бұл өз кезегінде аудан тұрғындарының қауіпсіздігін қамтамасыз ету үшін маңызды қадам болып табылады.
Сонымен қатар, өзен арқылы тұрғындардың қатынасы үшін жаяу жүргіншілерге арналған көпірлер салынып, маңайдағы елдімекендерге балалар алаңшалары да орнатылған. Бұл жұмыстар тұрғындардың әлеуметтік жағдайын жақсарту мақсатында жүзеге асырылып отыр. Әсіресе, жауын-шашынды көктем айларында өзеннің су деңгейі жоғарылап, тасқын болу қаупі төнген аумақтар толықтай қауіпсіз аймаққа айналды.
Жұмысшы топ атқарылып жатқан жұмыстарды мұқият бақылап, жобаның сапасы мен оның тұрғындарға пайдасы туралы оң бағаларын берді. Топ мүшелері өзен жағалауындағы инфрақұрылымдық жаңартулар мен қауіпсіздікті қамтамасыз ету бағытында қолға алынған шараларды жоғары бағалады.
Бұл шаралар ғана емес, жалпы экологиялық қауіпсіздікті қамтамасыз ету мақсатында атқарылып жатқан жұмыстар партияның экологиялық бастамалары мен халықтың өмір сапасын жақсарту жолындағы маңызды қадамдар болып табылады.
Жалпы, бұл жиын «AMANAT» партиясының Шымкент қаласындағы экологиялық және әлеуметтік мәселелерге деген жауапкершілігін тағы да дәлелдеді.
