(Фото: Шымкент қ. ішкі саясат және жастар істері жөніндегі басқарма)
Шымкентте қала әкімі Ғабит Сыздықбековтің тапсырмасына сәйкес Мемлекет басшысы Қасым-Жомарт Тоқаевтың биылғы Жолдауында айтылған басым бағыттарды түсіндіру және талқылау мақсатында жастар мен сала мамандарының қатысуымен кең көлемді кездесу өтті.
Бұл басқосудың ерекшелігі – онда жасанды интеллектіні (ЖИ) пайдалану мәселесі тек цифрлық технология тұрғысынан емес, жастарды еңбекке баулу, болашақ мамандықтарға бағыттау және кәсіби дағдыларды дамыту тұрғысынан қарастырылды.
Кездесуге Шымкент HUB аймақтық бөлім басшысы Құрманғазы Мұратов, «Азия Сервис» компаниясы директорының орынбасары Александр Андреевич, IT саласының білікті мамандары және қала студенттері қатысты.
Спикерлер жасанды интеллектінің артықшылықтары мен тәуекелдеріне тоқталып, оның кәсіпкерлік, білім беру және мемлекеттік басқарудағы қолданылу жолдарын талқылады. Олар жастарға бұл бағытта жаңа кәсіби дағдыларды меңгеру қажеттігін ерекше атап өтті.
«Біздің басты мақсатымыз – өңірде IT саласын дамыту ғана емес, сонымен бірге жастарды еңбекке баулу, оларды жаңа заманға сай мамандықтарға даярлау. Жыл сайын 170-ке жуық іс-шара өткізіледі. Стартап академиясы, ноу-код курстары, түрлі хакатондар мен тегін оқыту бағдарламаларының барлығы жастардың еңбекқорлығын арттыруға, оларды нақты кәсіпке бағыттауға арналған», – деді Құрманғазы Мұратов өз сөзінде.
Кездесу барысында жастардың болашақта қандай мамандықтарға сұраныс артып келе жатқанына назар аударылды. Сарапшылардың айтуынша, ЖИ-дің дамуы нәтижесінде деректер талдаушысы (data-analyst), жасанды интеллект инженері, киберқауіпсіздік маманы, робот техникасы инженері, цифрлық маркетолог, IT-жобаларды басқарушы сияқты жаңа мамандықтар алдыңғы қатарға шығып отыр. Сонымен бірге дәстүрлі мамандықтар да жаңа мазмұнға ие болуда. Мысалы, дәрігерлер ЖИ көмегімен науқастардың диагнозын тезірек анықтаса, мұғалімдер оқыту процесінде цифрлық құралдарды көбірек қолдана бастады. Бұл – жастардың еңбек нарығында бәсекеге қабілетті болуына жол ашатын үрдіс.
Соңғы екі жылда қаланың цифрландыру көрсеткіштері айтарлықтай өскен. «Smart City» жобаларының арқасында цифрлық қызметтерді пайдалану деңгейі 55 пайыздан 76 пайызға, ақпараттық технологияларды қолдану көрсеткіші 44 пайыздан 85 пайызға жеткен. Бұл – жастардың жаңа технологияларды меңгеруге деген ынтасы артып келе жатқанын көрсетеді.
Кездесу барысында студенттер мен жас мамандарға арналған бірқатар тегін жобалар таныстырылды. Соның ішінде «Стартап Орда» бағдарламасы ерекше назар аудартты. Екі ай ішінде қатысушылар өз идеяларын нақты өнімге айналдырып, бизнес-жобалар дайындап шыға алады. Бұл – тек білім беру емес, жастарды нақты еңбекке, табыс табуға және кәсіпкерлікке баулудың тиімді жолы.
Жалпы, жиын барысында жасанды интеллектіні дамыту тек технологиялық прогресс қана емес, сонымен қатар жастардың кәсіби болашағына инвестиция екені кеңінен айтылды. Спикерлердің пікірінше, қазіргі жастардың еңбекке адалдығы мен табандылығы жаңа технологияларды меңгерумен ұштасса, Қазақстан әлемдік деңгейде бәсекеге қабілетті мамандарды даярлай алады.
Жасанды интеллектіні меңгеру – болашақта сұранысқа ие мамандықтарға жол ашып, жастардың қоғамдағы орнын нығайтады. Сондықтан мұндай кездесулер – тек түсіндіру жұмысы ғана емес, еңбекке баулудың, мамандыққа бағыт берудің нақты алаңы болып отыр.
