Астана әуежайында жолаушыларды биометриялық сәйкестендіру жүйесін енгізу бойынша пилоттық жоба іске қосылмақ. Осыған байланысты Көлік министрінің бұйрық жобасы «Ашық НҚА» порталында жарияланды.
Ведомствоның мәліметінше, жоба жолаушыларға қызмет көрсету сапасын жақсартуға бағытталған.
Бұйрық жобасының түсіндірме жазбасында биометриялық сәйкестендіру жүйесін енгізу қызмет көрсету уақытын қысқартуға, ұшу алдындағы рәсімдерді оңтайландыруға және Астана әуежайындағы қауіпсіздік деңгейін арттыруға мүмкіндік беретіні көрсетілген.
Құжат 4 қарашаға дейін қоғамдық талқылауға ұсынылды.
Айта кетейік, бұған дейін Көлік вице-министрі Талғат Ластаевтың төрағалығымен еліміздегі әуежайлар мен әуе компанияларының басшылары қатысқан жиында 2026–2027 жылдардағы күзгі-қысқы кезеңге дайындық мәселелері қаралған болатын. Кеңес барысында азаматтық авиацияның қауіпсіз әрі үздіксіз жұмысын қамтамасыз етуге бағытталған бірқатар тапсырма берілді.
