Шымкент қаласындағы жұқпалы аурулар ауруханасына «Sauap» белсенділер тобының атынан оттегі концентраты және пульсоксиметр құрылғысы берілді. Науқастарды емдеуде мүмкіндігі зор бұл құрылғы жұмысты жеңілдетеді дейді мамандар. Қала әкімі Мұрат Әйтенов өз кезегінде жомарттық танытқан белсенділер тобына алғыс айтты.
Медицина қызметкерлері бұл аппараттарды жай-күйі ауыр науқастарды емдеудің барлық кезеңінде де қолдануға қажет болатынын алға тартуда.
Асар шағынауданындағы жұқпалы аурулар орталығында коронавирус және пневмония дертінің ауыр түріне шалдыққан науқастар ем алады. Індетпен күрестің алғы шебінде жүрген орталық дәрігерлері күні-түні аянбай еңбек етуде.
Шымкент қаласы денсаулық сақтау басқармасының мәліметінше, қазіргі жағдай бойынша қалада COVID-19 инфекциясын жұқтырғандар саны – 5134, оның ішінде 4285 науқас індетінен жазылған. Провизорлық орталықтарда 2810 төсек-орын бар болса, бүгінде оның 84 пайызы бос. 211 мобильді топ 22 376 науқастың үйіне барып алғашқы медициналық көмек көрсеткен.
