Шымкент қаласында «Еңбек» мемлекеттік бағдарламасының екінші бағыты – жаппай кәсіпкерлікті дамыту бойынша биыл жалпы 6 819 адамды қамтамасыз ету жоспарланған. Бүгінде нақты 4 816 адамға қолдау көрсетілді. Оның ішінде, 1 850 адамды «Бастау Бизнес» жобасы бойынша кәсіпкерлік негіздерге оқыту көзделген болатын. 9 айдың нәтижесінде бірінші ағыммен 2 820 адам оқуға жолданып, жоспар артығымен орындалып отыр. Бұл туралы Шымкент қаласы әкімінің баспасөз қызметі мәлімдеді.
Сонымен қатар, 55 адамға шағын несие беру жоспарланып, ауыл шаруашылығы қаржылай қолдау қорымен келісім-шарт түзіліп 67 адамға шағын несие берілген. Бұл да жоспардың асыра орындалғанын, яғни 121,8 пайызды көрсетіп отыр.
Сондай-ақ, 1 929 адамға 200 АЕК көлемінде мемлекеттік грант берілген. Мемлекеттік грантты негізінен АӘК алушылар, көпбалалы аналар мен жұмыссыз жүрген азаматтар иеленген. Бүгінде олар жеке кәсіптерін ашып, әлеуметтік жағдайларын жақсарту үшін еңбек етуде.
