Шымкент қаласының әкімдігі мен Өзбекстан Республикасы Бұхара қаласының әкімдігі арасында туризм саласын дамыту мақсатында екі жақты ынтымақтастық туралы меморандумға қол қойылды.

Шымкент қаласы әкімінің орынбасары Мақсұт Исахов Бұқара қаласы әкімінің орынбасары Камал Давроновпен бейне-байланыс арқылы тілдесіп, келісімге қол қойды. Бұл туралы Шымкент қаласы әкімінің баспасөз қызметі мәлімдеді.

Аталған меморандум екі жақты достық қарым-қатынасты нығайтып, алдағы уақытта туризмді дамытуда бірлесе жүйелі шаралар қабылдауға септігін тигізетін болады. Меморандум шеңберінде пандемиядан кейінгі кезеңде ортақ туристік өнімдер әзірлеп, оларды ішкі және халықаралық туристік нарыққа таныту, жарнамалық-маркетингтік компаниялар жүргізу және екі өңірдің туристік индустриясын дамытуда тәжірибе алмасу жоспарлануда.

Сонымен қатар, меморандумды жүзеге асыру мақсатында арнайы  іс-шаралар жоспары бекітілді. Демек алдағы жылдары Шымкент қаласы мен Өзбекстан қалалары арасында туристік қарым-қатынасты нығайту, туризмнің әлеуетін дамыту мақсатында бірқатар жаңашыл жобалар жүзеге асырылатын болады.