Шымкент қаласының әкімі Мұрат Әйтенов Еңбекші ауданы Тоғыс тұрғын алабындағы «Қазығұрт» мәдениет үйінің қазіргі жағдайын аралап көрді.
Мәдениет үйі 1988 жылы салынып, пайдалануға берілген. Өнер ордасы «Қазығұрт» өндірістік кооперативінің меншігінде.
Бүгінде нысанды қалалық мәдениет үйіне қарасты «Қазығұрт» мәдениет үйі (кітапхана) жалға алып отыр. Онда қазір үш адам жұмыс жасайды. Аумағы 1130 шаршы метр нысанда жөндеу жұмыстары соңғы рет 1998 жылы жүргізілген. Қазіргі таңда жылыту жүйелері істен шыққан. Тұрғындар көптен бері мәдениет үйін мемлекет меншігіне алу мәселесін көтеруде. Бұл туралы Шымкент қаласы әкімінің баспасөз қызметі мәлімдеді.
Қала әкімі нысанды мемлекет теңгеріміне алып, жөндеу жұмыстары жүргізілетінін атап өтті. Әбден тозығы жеткен, 350 орындық мәдениет үйі қайта жөндеуден өтіп, аталған мәселе жоспарға сай шешімін таппақ. Құрылыс жұмыстары аяқталған соң мәдениет үйінде түрлі мәдени-рухани кештер мен мерекелік шаралар,өнер сайыстары өткізілетін болады.
