Бүгінде Шымкент қаласында инфрақұрылым мәселесі кезең-кезеңімен өз шешімін тауып келеді. Мәселен, шаһардағы жолдар мәселесін шешу мақсатында қала қазынасынан қыруар қаржы бөлініп, биылдың өзінде 500 шақырымға жуық жол жөнделді. Дегенмен, шешімін таппаған мәселелер де жоқ емес.
«Nur Otan» партиясының қалалық филиалы ZOOM платформасы арқылы блогерлердің қатысуымен өткізген қоғамдық тыңдауда сол мәселелер кеңінен сөз болды. Десе де, блогерлер қалада көп жылдардан бері қордаланып қалған жарық, ауыз су, жол мәселелері шешімін тапқанын жоққа шығармады.
Осы орайда, инфроқұрылым мәселесінің келелі бөлігін алатын кәріз құбырлары да назардан тыс қалмады. Бүгінде қала аумағында жалпы 838 шақырым кәріз құбырлары бар болса, оның ішінде 168 шақырымы магистралды және 670 шақырымы ішкі орамдық жүйелер. Алайда, 73% құбырлардың тозығы жеткен. Осыған орай, қаланы кәріз жүйесімен қамтамасыз ету мақсатында 17 нысанның құрылысы жүріп жатыр. Осылайша, Шымкенттің кәріз жүйесімен қамтамасыз етілу деңгейі 49,1%-ды құрап отыр.
Қазіргі таңда, 140 мың адамды құрайтын 14 шағын ауданда ішкі орамдық кәріз жүйелерінің құрылысы жұмыстары басталған. Құрылыс нысандары келер жылы аяқталады деп жоспарланған. Сондай-ақ, осы жылдың соңында мемлекет және жеке инвесторлардың қаржысы есебінен 136 көпқабатты тұрғын үйге пайдалануға беру көзделіп отыр. Аталған жұмыстар аяқталса қаланы кәрізбен қамту көрсеткіші 49,1%- дан 52,3%-ға өседі.
Айта кетейік, 2021-2022 жылдары ішкі орамдық кәріз жүйелерінің құрылысы аяқталған жағдайда қаланың солтүстік бөлігінде орналасқан Шымсити, Асар-2, Достық, Тұран, Солтүстік саяжай шағын аудандары кәріз жүйесіне қосылуға мүмкіндік алады. Тәулігіне 18-20 мың текше метр кәріз суы қосымша тазартуға қосылады.
