Шымкент қаласының бас санитар дәрігерінің карантин мен шектеу шараларын ұзарту туралы жаңа қаулысы жарияланды.
Қаланың бас санитар дәрігері Әбдіманап Төлебаев Шымкенттегі карантин және шектеу шараларын 9 қараша 00:00-ден 23 қараша 00:00-ге дейін ұзарту туралы шешім қабылдады. Бұл туралы Шымкент қаласының ақпараттық-коммуникациялық орталығы мәлімдеді.
Қала тұрғындары мен қонақтарына көпшілік жиналатын іс-шаралар (туған күн, мерейтойлар, ұзату, құдалық, той, беташар және басқалары) өткізуге тыйым салынады.
65 жастан асқан тұрғындарға қалада қозғалуға шектеу қойылды.
Сондай-ақ, Шымкентте үш адамнан аспайтын топқа немесе бір отбасы мүшелеріне аулаларда серуендеуге, саябақтарға, алаңдарға, скверлер мен жағалауларға баруға рұқсат етіледі.
Гипермаркеттер, супермаркеттер, минимаркеттер және дүкендер 9.00-ден 22.00-ге дейін жұмыс істейді.
Тұрғындар арасында қоғамдық орындарда және атобустарда бетперделік режим сақталады. Сонымен қатар тұрғындар санитарлық талаптарды қатаң сақтауы тиіс.
Құжатты толығырақ Шымкент қаласы санитарлық-эпидемиологиялық бақылау департаментінің сайтынан (https://www.gov.kz/memleket/entities/departament-kkbtu) оқуға болады.
