Шымкент қаласы ішкі саясат және жастар істері жөніндегі басқармасының тапсырысымен «Қазақстан жастар фракциясы» «Әлеуметтік желі және қоғам» жобасы аясында тимбилдинг ұйымдастырды. Дендросаябақта өткен жиынға 50-ге жуық ЖОО студенттері мен қала жастары қатысты. Бұл туралы Шымкент қаласының Ақпараттық-коммуникациялық орталығы мәлімдеді.
Тимбилдингтегі «3 сағаттық оқыту курсында» SMM маманы Жанасыл Болатбек тәжірибесімен бөлісті. Ол өз сөзінде, республикалық «Жайдарман» жастар лигасының «youtube» арнасын бағыттаушы ретінде, жас блогерлерге мемлекеттік тілде бейнематериалдар түсіруге кеңес берді.
Оның айтуынша, «youtube» әлеуметтік желісінде қазақ тілді контенке сұраныс жоғары. Сондай-ақ тимбилдинг барысында жастар билік органдары мен халықтың әлеуметтік желілер коммуникациясы арқылы қоғамдық пікірді қалыптастыру проблемалары мен мүмкіндіктері тақырыбында дискурс жасады.
Жиын соңында логикалық ойындар ұйымдастырылып, қатысушыларға сертификаттар табысталды. Бұл іс-шара жастар арасында әлеуметтік желі арқылы қоғамдық пікірді сауатты айтуға және мемлекеттік тілге деген құрметті арттыруға өз септігін тигізді.
